Buzohlala obala ubugolide kuRefilwe Modiselle
UREFILWE Modiselle (34), osezakhele igama emkhakheni wokumodela nasekwethuleni izinhlelo kwithelevishini, uzokwaziwa ngoMansa uma eselingisa indawo ephambili yowesifazane wase-Afrika onebala elimhlophe efilimini yaphesheya ethi White Gold.
Ifilimu isungulwe ngumqondisi wamafilimu wase-UK, uLuke Bradford. Ilandela impilo kaMansa ebuhlungu ehlanganisa ukunqunywa kwakhe ingalo ngenxa yokuhlaselwa kwabantu abanebala elimhlophe.
Ube esefuna usizo kuNatron, umlingiswa wenkakha u-Aubrey Makola, umthakathi ogcina esemjikela ekugcineni.
Ifilimu ishuthelwe eWalkerville, eGoli, futhi iveza izimo zangempela ekade zenzeka eTanzania, e-East Afrika.
URefilwe akamusha ekulingiseni. Le ntokazi isike yabonakala kwifilimu ethi Tell Me Sweet Something, emdlalweni iGenerations, iThe River, Check Coast neMzansi Love.
Ichaza ngokubamba kwayo iqhaza kwiWhite Gold ithe yize imali yayingekho kahle kuyo kodwa yazitshela ukuthi yenza le filimu ngenxa yothando nokuqwashisa.
“Ngesikhathi ngifunda ngendawo yami okokuqala, kulapho ngasho khona ukuthi le ndaba kumele ngiyixoxele abantu emphakathini futhi nami ngibe khona efilimini. Okunye engifuna ukuthi kubonakale wukukhombisa ngekhono lami kubantu abangakaze bangibone ngilingisa. Ngihluke kakhulu kwiWhite Gold nangendlela abantu abahlale bengibona ngiyiyona kwithelevishini. Kulokhu ngiveza konke,” kusho uRefilwe.
URefilwe ubuye wachaza ngezingqinamba abhekane nazo ngesikhathi eqopha ifilimu.
“Bekumele ngifunde ukulingisa njengomuntu ongenangalo. Ngenxa yayo nje ifilimu kuningi obekumele ngikufunde, ngaphinde ngazifaka esimeni somuntu okhubazekile njengoba konke bekumele ngikwenze ngisebenzisa ingalo eyodwa. Kukhona nje lapho ngizobonakala khona ngiwasha ngisebenzisa izinyawo nesandla esisodwa. Kwenye indawo ngizobonakala endaweni yokudayisa ngizama ukudayisa izaqathi kodwa abantu belokhu bengibuka bezwelana nesimo engikuso,” kuchaza uRefilwe.
URefilwe uthe le ndawo kube ngenye yezibuhlungu kakhulu ukuzilingisa kodwa uyathemba ukuthi abantu bazoyithakasela futhi izofundisa iqwashise nasemphakathini ngoba yinto engenhle ukubulawa kwabantu abanebala elimhlophe.
“Lokhu kuhlukumezeka okwenzeka kubantu abanebala elimhlophe emazweni ahlukene e-Afrika akunasidingo. Konke okwenziwayo okuthinta ukuhlukunyezwa kwabebala yingenxa yabantu abanomhawu futhi yinto okumele bayiyeke, kumele iphele,” kuchaza le ntokazi.
Uthe yize bebhekene nalezi zimo kodwa ifilimu kukhona lapho imelaphe khona.
Uthe kukhona lapho imkhumbuza khona esakhula esaphila impilo ebuhlungu.
Ifilimu isanda kwemukelwa njengamanye azokhonjiswa kulo nyaka emcimbini wamafilimu iPan African Film Festival eLos Angeles.