Kunzima kubantu abahola kancane
IPHELELA emalini yokugibela imiholo yabasebenzi baseNingizimu Afrika, abahola kancane ukudlula wonke umuntu.
Lezi zindaba zivezwe wuMnuz Mervyn Abrahams, oyiProgramme Coordinator enhlanganweni eyenza ucwaningo oluthinta umphakathi, iPietermaritzburg Economic Justice & Dignity Group.
U-Abrahams wenze isibonelo sokuthi umuntu ohola uR3 168 ugibela ngoR28 ukuya nokubuya emsebenzini.
Lo mholo awubhekile yena yedwa, uthola ukuthi ubheke abantu abathathu kuya kwabayisithupha.
Uthe impilo izoba nzima kulo nyaka ngoba iholo labo ngeke linyuke ngemali etheni.
U-Abrahams uthe i-National Minimum Wage
IKHASI ELIKHOKHELWE izonyuka ngo-5% kulo nyaka kodwa lokhu ngeke kulethe umehluko kubantu abaningi kwazise abanye vele abawuholi lowo R20 ngehora. “Kunezinkampani ezicele ukuthi zingabaholeli uR20 ngehora abasebenzi ngoba kazinawo amandla okwenza lokhu. “Okusho ukuthi abasebenzi okufanele bahole uR20 bagcine sebehola uR18, kwathi abasebenzi basemapulazini okufanele bahole uR18 bahola uR16, abasebenzi basezindlini okufanele bahole uR15 bagcina sebethola uR13.50 ngehora. “Kulo nyaka iNational Minimum Wage izonyuka ngo-5%, okusho ukuthi abasebenzi bazothola uR1 owengeziwe ngehora,” kusho u-Abrahams. Uthe kulo mholo abantu kufanele bathenge ukudla, bagibele bathenge ugesi nezinye izidingo.
“Uthola ukuthi ugesi uR598.52, imali yokugibela ibe wuR1 231 bese kuba ngeyokudla eya ngokuthi umndeni mkhulu kangakanani.
“Abanye benza igilosa kaR1 227, okusho ukuthi basala nemali encane yokubhekela ezinye izidingo,” kusho u-Abrahams.
Uthe iNational Minimum Wage ayiwenzi umehluko kubasebenzi bakuleli ngoba vele bahola kancane.
Akusiyo yodwa iPietermaritzburg Economic Justice & Dignity Group ekhala nge-National Minimum Wage kwazise nemifelandawonye yezinyunyana, okuyiCosatu, Fedusa neminye iyakhala ngale mali.
I-Cosatu igquqquzele abasebenzi ukuthi bakhulume ngezwi elilodwa, balwe nokuxhashazwa. Ithe yona ifuna uhulumeni anyuse i-National Minimum Wage ngo-12.5% ukuze abantu bakwazi ukuphila.