I-Downs neWydad banenhloso efanayo
NGEKE ube nduvanduva umdlalo wokusonga iqoqo leCAF Champions League phakathi kweMamelodi Sundowns nezimbangi zayo ezinkulu ebholeni lase-Afrika, iWaydad Casablanca yaseMoroco kusasa ngo-3 ntambama, eLucas Moripe Stadium, e-Atterigdeville.
Ukubuya kweSundowns nephuzu e-Angola seliyoshona kwiPetro de Luanda kwenze ezikaPitso Mosimane zamelwa wukuqinisekisa ukuthi azehlulwa kulo mdlalo wakusasa. Uma iSundowns iphumelele ukugwema induku izolidla iqoqo okuyinto uMosimane abelokhu eyishumayela.
Njengoba iWaydad inqobile yona kowayo, isingalidla iqoqo uma inganqoba kwiSundowns. Ngeke akuvume lokhu uMosimane kwazise amaqembu asevele awadlile amaqoqo awo abukeka eyinkinga. Iqembu elizodla iqoqo lizobhekana nabalale isibili kwawabo.
“Ngeke uphole lo mdlalo ngoba kuzobe kubhekene amaqembu azazi ukuthi ayizinkunzi e-Afrika. Sifuna okufanayo ngokunqoba iqoqo. Awukho umdlalo wobungani phakathi kwethu, uzozibonela emdlalweni.
“Nendaba yokugwema ukudlala namaqembu anzima adle amaqoqo awo ikhona. Asikho isidingo sokucija abadlali ngoba lo mdlalo ufana nayo yonke emikhulu ehlale imqoka,” kusho uMosimane ophinde wanxenxa abalandeli ukuthi baphume ngobuningi babo.
Emaqenjini angase adle amaqoqo awo nafuna ukugwenywa wuMosimane, singabala kuwona iTP Mazembe, Al Ahly ne-ES Tunis kanti kwangase alale isibili kukhona iZamalek, Raja Casablanca ne-Etiole du Sahel.
Okungaba yinkinga lapha kuMosimane wukuthi nakuwona amaqembu asethubeni lokulala isibili, kubukeka kunzima futhi anamagama aziwayo ebholeni laseAfrika.
Akuzona zodwa izinongo lezi kepha iSundowns ihlale njalo inegqubu uma ibhekene neWaydad kwazise womabili la maqembu azibona eyizinkunzi ebholeni lase-Afrika.
Kusekhona futhi kuMosimane ukuthi lo mdlalo ungabaqophisa umlando omusha emidlalweni yamaqoqo.
I-Sundowns igcine ngo-2000 ukudla iqoqo ngamaphuzu angu-12.
Kumanje iSundowns inamaphuzu angu-11 emidlalweni emihlanu.
Ukunqoba kuzokwenza ezikaMosimane ziziqophele umlando omusha okungaba yisinongo ngaphambi kokuqala kwemidlalo yokukhumulajezi yamaquartefinal.