UManqana uzobafundisa lukhulu abadlali abasakhula
KULELI sonto sibhale ngento engithinte kakhulu emoyeni, kanti angiyena umuntu osheshe azwele noma osheshe abe nesibibithwane.
Nokho ukuzwela nokukhihla esikaNandi uyinjeza yakwenu, akusho ukuthi usuke ungendoda yalutho. Empeleni wubani lo owathi amadoda awabuzweli ubuhlungu njengabesifazane? Sonke singabantu ngakho bonke ubuhlungu buya ngqo enhliziyweni, kithina sonke.
Ngikhumbula kahle ngibuka umdlalo wamanqamu weMTN 8 phakathi kweLamontville Golden Arrows ne-Ajax Cape Town e-Orlando Stadium ngo-2009. Phela le nkundla kwakudlalelwa kuyo okokuqala emuva kokulungiselwa ukuza kweNdebe yoMhlaba ka-2010 eNingizimu Afrika.
Inkundla yayiluhlaza cwe futhi kwasheshe kwacaca ukuthi alikho iqembu elalizokhononda ngokuthi alikwazi ukuyincinza kahle, liphaselane ngobunono ngoba kwase kunesikhathi kwagcina ukudlalwa kuyo. Nokho okwenzeka ngangingakulindele nakancane. Abafana Bes’thende babhudluza i-Urban Warriors ngo 6-0 bakhala bemuka nendebe yeMTN 8.
Amagoli ayisithupha emdlalweni wamanqamu! Yinto engajwayelekile leyo ebholeni laseNingizimu Afrika ngoba eyamanqamu ihlale ishubile, lingekho elifuna ukugoba uphondo kalula. Ngaphandle kwalokho le Ajax eyashaywa kabuhlungu kanje yayidlala elihle ibhola leli, ngakho i-Arrows yaqopha umlando ngokuyibhambabula ngo 6-0.
Okunye engikukhumbula kahle wukuthi igoli lesithupha lashaywa nguNjabulo “Mvonqo” Manqana. Wayengomunye wabadlali abebebaba njengopelepele kwi-Arrows, eyayiqeqeshwa nguManqoba Mngqithi (osekwiMamelodi Sundowns) noMandla Ncikazi (osayibambile kwi-Arrows).
UManqana engikhuluma ngaye wayeyibamba kushayisane amadolo ezitheni esiswini se-Arrows. Lokhu kwaholela ekutheni amaqembu aseGoli amfune uthuli ikakhulukazi emuva kwalo mdlalo wamanqamu lapho i-Arrows yayikhombisa abalandeli bakanobhutshuzwayo ukuthi ayibizwa ngaBafana Bes’thende ngoba kudlalwa.
Empeleni lo mdlali wake wathi qu kwi-Orlando Pirates ngo-2012 kodwa ngebhadi angikhumbuli ngimbona egqoke imibala yeZimnyama. Angazi-ke noma waphundula mina yini umdlalo awudlala...kodwa-ke lezi zinto ziyenzeka ebholeni. Okufike kwangithunuka kakhulu ngodaba esilukhiphe ekhasini lokugcina kwezemidlalo ngoLwesithathu wukuthi uManqana useneminyaka ewu32 nje kuphela. Lokhu kuchaza ukuthi kufanele ngabe usalidlala ibhola elikhokhelayo kodwa ngebhadi kwasheshe kwaphela ngekusasa lakhe
THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. kunobhutshuzwayo. Uzishole yena-ke umfo kaManqana ukuthi into eyamenzela phansi kakhulu ngabangani abangalungile nezidakamizwa. Uyazi uma umuntu esekhuluma kanje usuke esebuka emuva ecabanga ukuthi uligxobe kanjani ikusasa lakhe ngenxa yezinto ayengazigwema. Emhlabeni akekho ongalenzi iphutha ngakho angifuni ukuthatha isando nezipikili ngiqongqothele uManqana esiphambanweni, ngimnqamuleze njengoba kuthiwa kwenzeka kuJesu.
Okungemnandi ngamaphutha esiwenzayo njengabantu wukuthi abanye bethu baba nenhlanhla yokuphuma kuwona, baphinde bayiqhube kahle impilo njengoba kwenzekile kuJabu Mahlangu, owayedume ngelikaPule. Nokho akuthina sonke esithola ithuba lokuthi silungise amaphutha ethu bese izinto ziphinde zisihambele kahle njengasekuqaleni.
Abalufundile udaba lukaManqana bazizwele eyala abadlali bebhola abasebancane ngokuthi bagweme abangani ababi, uphuzo, izidakamizwa nokusebenzisa imali budedengu. Kuhle ukuthi uphumele obala waveza ukuthi yini eyamenzela phansi, okuyinto engicabanga ukuthi izoba yisifundo nakwabanye abadlali abasahola kahle emaqenjini abo.
Abadlali bethu bakanobhutshuzwayo kumele bayibukisise kahle le ndaba yabo yokuba yinhlekisa ezweni ngemuva kokuphanyeka amakhokho abo emgibeni. Ungaba kanjani ulopholo ongenalutho kade uhola u-R100 000 ngenyanga? Angisho ukuthi yimali eyayiholwa uManqana lena kodwa ngiyazi ukuthi kukhona abadlali abahola ngisho o-R400 000 ngenyanga kwi-Absa Premiershi njengoba ibhola lakuleli selithuthuke kakhulu.
Abadlali bakanobhutshuzwayo kusamele bafunde kwabebhola lombhoxo okungavamisile ukuba bazithole sebeqhathanisa usizi ngemuva kokuyeka ukudlala. Awukho umlingo abenza ngawo ngaphandle kokuthi imali bayayonga, bayisebenzisa ngendlela, bayifaka ezindaweni ezizoyenza ikhule baphinde bathenge nemizi kusakhanya.
Impilo yokujabulisa abangani, izidakamizwa, izimoto ezibizayo nokukhohlwa wukuthi uma imali ingasangeni ngeke uyicoshe phansi, kuyizinto okumele bacabange ngazo abadlali bebhola ngesikhathi kusahamba kahle. Baningi ababedlala ibhola abazinakekela ngendlela futhi obabonayo namanje ukuthi abaswele lutho. Lapha sibala abadlali abafana noJimmy Tau, Siphiwe Tshabalala, Lucas Radebe nabanye.
UMahlangu (Pule) waba nenhlanhla yokuthi wavuka wazithatha yingakho izinto sezimhambela kahle manje. Abanye-ke angifuni nokuwabala amagama abo ngoba kuzoba sengathi ngihlekisa ngabo ngoba nakhu izinto zingasabahambeli kahle.
Ngiyethemba ukuthi ukuphumela obala kukaManqana kuzobafundisa lukhulu abadlali abasakhula. Ngikufisela konke okuhle mfo kaManqana.