OweChippa akanavalo lwePirates edla kwasani
UBHEKENE nenkiyankiya umqeqeshi weChippa United, uNorma Mapeza, njengoba iqembu lakhe lizodudulana ne-Orlando Pirates emdlalweni we-Absa Premiership ngempelasonto.
Umdlalo useNelson Mandela Bay Stadium kusasa ngo-6 ntambama.
Okunikeza inkinga uMapeza wukuthi lapha bazodlala neqembu elingabambeki kulezi zinsuku. IPirates isiqhube imidlalo eyisithupha ingahlulwa kanti isinqobe emine kulandelana ngaphansi kobuholi bukaJosef Zinnbauer.
Ngasohlangothini lweChilli Boys, izobe ilwela ukubuyela emgqigqweni wokuwina ukuze ingabuyeli ezembeni lapho uMapeza eyisuse khona.
Unyaka abawuqalanga kahle behlulwa yiPolokwane City ngo 2-0. Kwemithathu elandelile bakwazile ukuqoqa amaphuzu amahlanu ngaphambi kokushaywa yiSuperSport United ngo 3-0 ngempelasonto edlule.
Le miphumela ibeka iChippa endaweni ka-12 kwi-log ngamaphuzu awu-22. Okwamanje iqhele ngamaphuzu amahlanu kulawo alwela ukungayi ehlathini.
Okunye okungase kube yinkinga ngokudlala nePirates wukuthi kungenzeka kube wukugcwala kwebhantshi kuMapeza uma behlulwa.
Phela umqeqeshi wokugcina obesebhentshini bedlala namaBhakabhaka, uClinton Larsen, waphonswa emnyango ngemuva kokwehlulwa ngo 2-1.
Nawo lo mphumela wawulandela eminye eyayingemihle.
UMapeza ebuzwa ngokuthanda ukuxoshwa kukasihlalo weChippa, uSiviwe Mpengesi, uthe: “Yonke indawo uma ungumqeqeshi siphila nalezi zinselelo. Uma kungangisebenzeli lapha ngeke ngibe wumqeqeshi wokuqala ukulahlekelwa wumsebenzi. Ngisho e-Europe abaqeqeshi abaphezulu bayalahlekelwa umsebenzi ngenxa yemiphumela emibi. Ibhola limayelana nemiphumela kodwa okwamanje ngicabanga ukuthi sihamba kahle. Angikhathazekile ngalutho. Uma kukhona okwenzakalayo kuyobe kuyinto ejwayelekile ebholeni.” Uthe kuzomele balungise amaphutha abawenzile bedlala ne-United ngaphambi kokubhekana nePirates. “Sibe nomdlalo omuhle (kwi-United) esiwombeni sokuqala njengoba sikwazile nokwakha amathuba. Esiwombeni sesibili asizange sivale kahle emuva ekubeni emidlalweni yethu edlule udonga lwethu belungenye yezindawo eziqinile. (IPirates) Iyiqembu elikhulu kuzomele silungise izinkinga esizenzile bese sibona ukuthi umdlalo uqhubeka kanjani,” kusho uMapeza. Ngalo mdlalo wangempelasonto iChilli Boys izobe igubha iminyaka eyishumi yasungulwa. UMapeza uthe ngeke akhulume ngemibhiyozo yeqembu bebe bengakadlali. “Asikhulume ngomdlalo kuqala bese sikhuluma ngemigubho. Angiqali ukuba seqenjini elihlanganisa iminyaka lasungulwa,” kusonga lo mqeqeshi odabuka eZimbabwe.
Imidlalo ye-Absa Premiership: Namuhla: Maritzburg United v Cape Town City FC (Harry Gwala Stadium, 8pm)
Kusasa: Chippa United v Orlando Pirates (Nelson Mandela Bay Stadium, 3.30pm); Lamontville Golden Arrows v SuperSport United (Sugar Ray Xulu Stadium, 3.30pm); Highlands Park v Baroka FC (Makhulong Stadium, 3.30pm)
Ngesonto: Black Leopards v Stellenbosch (Thohoyandou Stadium, 3.30pm); AmaZulu FC v Polokwane City (Kings Park Stadium, 3.30pm)
Imidlalo yeGladAfrica Championship kule mpelasonto Namuhla: Cape Umoya United v Jomo Cosmos (Athlone Stadium, 3.30pm) Kusasa: JDR Stars v Richards Bay (Soshanguve Stadium, 3.30pm), Free State Stars v Ajax Cape Town (Goble Park, 3.30pm), TS Galaxy v Swallows FC (Kameelrivier Stadium, 3.30pm), Real Kings v Royal Eagles (Chatsworth Stadium, 3.30pm), Mbombela United v TS Sporting (Kanyamazane Stadium, 3.30pm) NgeSonto: Pretoria University FC v Tshakhuma Tsha Madzivhandila (Tuks Stadium, 3.30pm)