Ichusha futhi ipakeka kalula i-108
ANGIKAZE ngizwe noyedwa umuntu ethi akanankinga nokuhamba ngezithuthi zomphakathi impilo yakhe yonke. Kunalokho abantu abaningi bafuna ukuba nezabo izimoto ukuze impilo izoba lula.
Enye yezimoto ezikhethwa ngabathenga imoto okokuqala yiPeugeot 108.
Ubuncane bayo buyenza ibe lula ukuyishayela nokuchusha kalula, ikakhulukazi edolobheni lapho kuphithizela khona izimoto eziningi.
Ubuncane bayo bugqama kakhulu ngaphakathi ngoba izihlalo zangemuva zithothene.
Empeleni kuba nzima ukuhlala kuze kube ngcono ezinganeni ezincane. Kuba nzima ukudla phambili uma ungumuntu onomzimba owondlekile, asikho isikhala esitheni phakathi komshayeli nomgibeli.
Okumnandi ngesihlalo somshayeli uyasihlela ukuthi sime kanjani futhi nesiteringi naso siyanyakaza sibe sendaweni oyifunayo.
Isikhala ebhuthini siwu-227 litres futhi kukhona isondo eliyisipele. Uyakwazi nokwandisa indawo ngokulalisa izihlalo ibe ngu-868 litres.
Okuhle ngokuba ngaphakathi kuyo ukuthi inezinto eziyenza ihambiselane nezimoto zesimanje. Ngaphambili kukhona itouchscreen infotainment system okwazi nokuxhuma kuyo iselula ngeBluetooth noma nge-Apple CarPlay.
Indlela abayakhe ngayo ngaphambili iyangichaza ngoba alukho uxhaxha lwamabhathini nokwenza kube lula ukusheshe uyijwayele futhi wazi ukuthi ngawani.
Ezicabheni kunezikhala zokubeka iziphuzo bese kuba nezinkinobho zokuvula awangaphambili njengoba esebenza ngogesi.
Ngaphandle ibukeka kahle. Njengoba kuyimoto encanyana nje engu-840kg, ubude bayo bungu-3.47m kuthi ububanzi bube ngu-1.62m nokwenza kube lula ukuyipaka njengoba ingenawo ama sensor nje.
Ngaphambili inamaLED daytime running lights ngezansi ukuze abanye abasebenzisa umgwaqo bakwazi ukukubona. Amasondo eceleni angu-14 inch.
Lo mncanyana uhamba ngenjini engu-1.0 VTi 3-cylinder kaphethroli. Inamandla angu-53kW kanti isebenzisa ugearbox oyi-5 speed manual.
Emgwaqeni kuba wukubona indawo enyukelayo nje, ikhathale nokudinga ushintshe amagiya, uqale phansi.
Ngale kwalokho uma uzihambela edolobheni ikahle kakhulu futhi noma uyifaka kuthelawayeka ikahle iyahamba ayikhalisi.
Uma udinga ukudlula enye imoto ubambe ijubane yilapho okumele wehlise amagiya khona.
Ngebanga lika-100km bathi isebenzisa amalitha angu-4.1 kaphethroli kodwa kimi ibidla angu-5.5.
Kwezokuphepha, nokuyinto ebaluleke kakhulu, ifika namabhreki e-ABS, Electronic Brake Force Distribution, Emergency Collision Braking System ne-ESP. Ifika futhi nama- airbag ayisithupha.
Inani: 108 ACTIVE 1.0 53kW 5MT
R 184 900
Ifika ne service plan yeminyaka emihlanu noma u-100 000km, warranty yeminyaka emihlanu noma