Yikhande imoto enomkhuhlane
LWASHO lwaphakama futhi lolo fufunyane oluvuka kanye uma sesigoqa isonto, lwathi masimemezele kubo bonke abathandi nabasebenzisi bokudumayo ukuthi sesishayile leso sikhathi sokuthi sicindezele ama-hazard ethu sikhwebukele eceleni komgwaqo lapho kuphephe khona.
Ngesikhathi sesiqinisekisile ukuthi asiphazamisi moto futhi asikho esigangeni esingagcina sesidlala izinswelaboya, sesingagobodisa amakhanda ethu zingqengqe nale ngosi kwelakho lodumo lokuwela umfula ugcwele.
Awanamhlanje amahazard, sisesimeni sokuvalwa emgwaqweni yimbokodo ebomvu ihlola isimo somshayeli mayelana nophuzo oludakayo. Masikuveze ukuthi njengabashayeli sinakho ukunengeka noma ukushaywa wuvalo noma ngabe asinacala uma sibona ezakwadalawane zishaye imvimbamgwaqo.
Nokho kusijabulisile ukuthi isibalo sabashone ezingozini zomgwaqo phakathi komhlakaDisemba-15 nomhlaka-15 Januwari zehlile uma ziqhathaniswa neminye iminyaka edlule. Siyabonga kulabo abalekelelile ukuthi lezi zibalo zehle, kepha sifisa ukuthi ngeminye iminyaka kuthiwe akukho mphefumulo olahleke engozini yomgwaqo.
Nokho eyanamuhla ingosi ichukuluzwa yisimo esiqhamuke ngesikhathi amaphoyisa eseqeda ukuhlola isimo sami, angenela kwesemoto ebengihamba ngayo. Eqinisweni abengabhekile esimeni semoto kodwa abefuthisa kuphela.
Le nqokonqoko yakwethu yiyo ezibizele ukukhuluma ngesizathu engisaziyo kwamina. Ngonyaka odlule ngashaywa yisichotho kwachachamba iwindi langaphambili nobhonethi waba mafacafaca wena owabona izidlathi zabantu okwakuthiwa bahle kudala.
Abomthetho babonile ukuthi angikaze ngathinta ezinkambeni kodwa esikhundleni sokungidedela ngedlule kuqale icala laleli windi elichachambile elinofa. Bebesho ukuxebula umthelo, ngashweleza ngaze ngasenga ezimithiyo ngathi ngiyolifaka khona namuhla.
Nokho bagcine bangidedela ngesexwayiso kodwa okungasho khona ukuthi bangidedela ngoba lingekho icala bese bengidabukela. Ngibonge nganconcoza, ngayishaya yazula.
Ngibe sengihlala ngicabanga ukuthi kunezinto esizithatha ngokuthi zincane ngoba aziyimisi imoto, esiziqiniselelayo ezimotweni. Phakathi kwazo lezo zinto kubala lona iwindi elinofa. Ngibe sengiphuthuma lapho kufakelwa khona amawindi ngababuza ukuthi malini ukufanela iwindi, bathi R1 300.
Yebo, le mali ithanda ukuba nzima uma kade ungahlelile kodwa uma ucabanga uyabona ukuthi ayisho lutho kunokuphepha kwakho nokuvika ithikithi elibomvu.
Kunezinto ezincane ezizibekayo emotweni phakathi kwazo noma singeke sizisho zonke kubala isevisi, amawayipha agugile uze ukhumbule mhlazane seliyidliva, ilambu lenamba puleti, amasondo aphelile nemihuzuko emincane okanye ukupaqaka okungakhubazi ukuhamba kwemoto.
Namalambu amakhulu uma nje kusakhanya elilodwa kuyenzeka uqinisele uthi uzolishintsha kepha ubuye uzibe uze ukhumbule ngoba sekuhlwile. Hhayi-ke, angisayiphathi eyama fog light wona azitshwa kanjalo ungaze uzibuze ukuthi kanti ayakhelwani emotweni?
Ne-air conditioner iyazibeka, ufice umshayeli esejuluke emfoma enqena ukuyogcwalisa igesi ngoR300 kodwa imali yebhodlela neka phethroli iphuma iqhasha.
Kunabantu abangezwani nokuthela uphethroli emotweni, bancamela ukuhamba ngelambu, imali isekhukhwini ikakhulukazi uma bezungeza edolobheni noma endaweni yangakubo. Bese kuba yisondo eliyisipele. Kukangaki nje ulihlola umoya ukuthi usakhona yini nokuthi zikhona yini izipanela zokuliqaqa?
Nothi olukhomba ijubane lemoto liyazitshwa bo. Kukhona nezimoto ezihlala ziqhakaze amalambu aphuzi ngaphakathi uma uthi uyabuza kumshayeli bakutshele ukuthi amahlalakhona. Cabanga nje imoto ikhanyise ilambu lenjini kodwa wena uqhubeke nokuhamba ngayo bese kuthi lapho iyeka khona ukuhamba, uqale uyisole ngokuthi iyahlupha kanti uma ibika umkhuhlane uyayiziba.
Amabheshu odaka nawo avamisile ukunganakwa, imoto uyibone seyishaya ngodlundu kabhemude nje ngoba umshayeli kumbe umnikazi enqena ukuthi ayilungise. Ziningi ezinye izinto eziqiniselwayo abanye bahamba ngezimoto ezinezicabha ezivalwa sakusivula usivule sakusivala noma okwaziwayo ukuthi iwindi elithile alivulwa ngoba alibe lisavaleka zonke lezi zinto zibukeka zincane kanti akunjalo.
Kuyinike umphumela wokuziba lezi zinto esizithatha ngokuthi zincane; ungazithola sewubhalwa ithikithi, imoto ingavele ife kakhulu ngaphandle kokuyaleza uma uziba amalambu aphuzi.
Uma uziba amasondo bese uba sengozini noma ngabe akuwena osephutheni kodwa umshwalense uvele ukushiye kunjalo uphefumula ngenxeba, umkhonto ubhajwe phakathi enxebeni lutho ukukhokha. Kahle-kahle imoto idinga uthando futhi ayibafuni ongoqo.
Umbono wama-hazard uthi ukuqinisela ngoba uthi yinto encane yikho okugugisa imoto iphenduke umkhehlekhehle kas’gedlemba. Imoto idinga ukunakekelwa nsuku zonke, ungaqiniseli, ungalindi amathonsi abanzi ngoba izinkinga ziyalakanyana futhi ziyakhula.
Hhayi-ke, asethembe ukuthi sonke sizwile, sesingawavala lana ama-hazard ethu, sethembe ukuthi bonke abashayeli bazobuyela emgwaqweni bashayele ngesizotha nangokubuswa yimithetho yezokushayela injengoba injalo ukuze sihlangane sisawuphonsa umbalane nangesonto elizayo enyangeni entsha. Uma ufisa siyiqhube le ndaba ngena ekhasini lethu Igedlela lami with Sthembiso Shangase kwiFacebook. Yimi owenu nali ikheli ngezansi hazardiso@gmail.com