Abafundi bamukelwe ngodumo
BEKUQHILIKA izihlathi kubafundi abadle umhlanganiso emncintiswaneni wokubona ukuthi abafundi bazi kangakanani ngomthetho nangoMthethisisekelo, i-International Justice Moot Court Competition obusePoland ngoLwesine nangoLwesihlanu.
Abafundi baseMathubesizwe nabaseEden College bebemele i-Afrika emncintiswaneni. Izolo bafike esikhumulweni sezindiza, iKing Shaka International Airport, sebelindwe yizihlobo, abangani, ozakwabo abafunda nabo nezikhulu zoMnyango wezeMfundo bebahalalisela ngempumelelo yabo.
Emncintiswaneni abafundi benza sengathi basenkantolo, kube khona umfundi owumshushisi, ovikela ummngalelwa, kuphikiswane ngamaphuzu omthetho, inkantolo bese ithatha isinqumo. Abawine icala kuba yibo abawinayo.
Emncintiswaneni bekuqhudelana abafundi abaphuma emazweni wonke omhlaba abawine emazweni abo, kwawina abaKwaZulu Natal abebemelwe iMathubesizwe ne-Eden College.
UDkt Enock Nzama, inhloko yomnyango, obengomunye wabebezokwamukela abafundi uthe ukuwina kwabo kukhomba ukuthi iKwaZulu-Natal nayo iyakwazi ukukhiqiza abafundi abakwaziyo ukuncintisana nabanye abafundi emhlabeni.
“Sijabule kakhulu lo mncitiswano usinike ithuba lokuthi sivele emhlabeni wonke kanti , ukuwina kwalaba bafundi kuzophinde kunikeze ithemba nakwabanye abafundi bethu,” kusho uNzama. UNkk Sthoko
Shange ongumgqugquzeli womncintiswano eKZN, uthe kuthatha izinyanga ezingu-11 ukulungisela umncitiswano, oqala ngokuqhudelana kwabafundi esikoleni kuhlungwe kuze kusale abamele isifundazwe. Nabo baqhathwa nabezinye izifundazwe. Abaphumelele bamela iNingizimu Afrika.
UNozipho Dube (17) noNondumiso Ntshangase (17) abafunda uGrade12 bebemele iMathubesizwe High, uCarltlin Scwharer (18) noSarushka Naidoo (18) bemele i-Eden College.
UNondumiso othi ufuna kwenza izifundo zeCommercial Law, uthe: “Uvalo besinalo, obekubuye kusithuse kakhulu wukuthi abafundi abaningi ebebekulo mncintiswano bebemhlophe, bebebahlanu kuphela abafundi abamnyama bonke bebephuma eKZN.
Wububona ukuthi akekho ocabanga ukuthi singadla umhlanganiso kodwa sibakhombisile ukuthi nasezikoleni zasemakhaya kuyafundwa, uma uzimisele akukho lapho ungeke ufinyelele khona,” uNondumiso.
Uzakwabo, uNozipho naye ofuna ukwenza iziqu zomthetho, uthe ubengalindele ukuthi bazofika sebelindwe yizihlwele ezizobahalalisela, lokho ubeke akubone kubadlali.
Unina kaNozipho, uNkk Nonhlanhla Dube uthe akamangali ukuthi indodakazi yakhe isiphuma phesheya ngenxa yobuhlakani bayo ngoba kusukela yaqala ukufunda ihlale iwina.
UNkk Nozipho Ntshangase, unina kaNondumiso uthe kumthathe isikhathi eside ngaphambi kokuthi akholwe wukuthi ingane yakhe izoya phesheya yize kade ebhalelwa izincwadi etshelwa.