Yingani i-Old Mutual ingacacisi konke zisuka?
EZABATHENGI
NGONYAKA odlule abakwa-Old Mutual bazidonsela amehlo ngokunqaba ukukhokhela umndeni owawushonelwe, bethi bafuna ukuqinisekisa ukuthi umufi ushone ngempela. Kubukeka sengathi abawuyekile lo mkhuba wabo ngoba ngibhalelwe wuDube ekhala ngokuthi akathokozile neze ngale nkampani. Nasi isikhalo sikaDube ngezansi:
Angithokozile ngokuba nomshwalense ne-Old Mutual. Mhla ka-7 Januwari 2020 ngahambisa amaphepha okukhokhelwa ngoba ngishonelwe, egatsheni elikuGardiner Street eThekwini. Ngosuku olulandelayo ngathola umyalezo othi badinga incwadi efungelwe esuka kunina wengane eqinisekisa ukuthi nginguyena uyise wengane.
Lokho kufanele kuhambe nekhophi kamazisi kanina wengane. Ngiphuthume ngaleso sikhathi ngiyihambise. Ngomhla ka-9 ngithole omunye umyalezo othi badinga imininingwane yengane eshonile nefomu eligcwaliswe yiphoyisa. Iphoyisa laliligcwalisile ifomu kodwa ngenxa yobudedengu bentombazane eyayingisiza kwa-Old Mutual yalihambisa ingaligcwalisanga. Ngaphindela futhi ngalihambisa ifomu. Ngosuku olulandelayo mhlaka 10-01 okwakuwusuku esangcwaba ngalo ingane ngathola omunye futhi umyalezo othi badinga incwadi efungelwe echazayo ukuthi ingane eshonile ngeyami ngokwegazi ngempela.
Ngakusasa mhla ka-11 ngaya egatsheni labo elisePavilion ngabanika futhi leyo ncwadi. Kungani bengangitshelanga ngifika mhla ka-7 okokuqala egatsheni?
Mhlawumbe-ke ngasizwa wumsebenzi ongazi lutho ongaqeqeshekile. Kungani-ke ngingatholanga umyalezo owodwa ochaza konke okufanele ngikulethe ukuze bakhokhe?
Into i-Old Mutual enendaba nayo yimali eza kuyo, ayisiphathi kahle, yenza amaphutha asifaka ezindlekweni. Le nkampani iyahluleka wukusinika esithembisa kona.
Impendulo yakwa-Old Mutual:
Udaba lukaMnuz Dube selulungisiwe ngababhekele amakhasimende kwaOld Mutula, ukhokhelwe ngoJanuwari 14.
Ezabathengi zibuzile ukuthi kungani i-Old Mutual ithatha isikhathi eside ukukhokhela abantu abeshonelwe. Bathe badinga ukuqinisekisa ubuhlobo bosuke eshonile nozokhokhelwa imali.
Bathe ziningi izindlela abazisebenzisayo ukuthola ukuthi abantu bahlobene, ababale kuzo ukusebenzisana noMnyango wezaseKhaya ukuthola imininingwane kamufi nokuthi mhlawumbe yingani enesibongo esihlukile kunesikayise uma kuwukuthi ingane eshonile ibibiza isibongo esingafani nesikayise.
Mina ngibona sengathi kufanele sisukume singabathengi siyeke ukudlala i-Old Mutual, cabanga nje ukube uDube ubelinde le nkampani ukuthi imkhokhele ngabe ungcwabe nini njengoba ikhokhe sekudlule umngcwabo.
Kufanele sonke sifake isikhalo ku-Ombud for Long Term Insurance sikhale ngeOld Mutual ngoba kubonakala sengathi uma sishonelwe kufanele sihambise izidumbu emahhovisi ayo ngaphambi kokuthi isikhokhele. Uma sifaka kuzophenywa ukuze ishintshe indlela eyenza ngayo.
U-Ombud for Long Term Insurance utholakala ku -021 657-5000/086 010 3236
Email: info@ombud. co.za Website: www.ombud. co.za
Abatshala imali bayaxwayiswa ngamaemails omkokotelo okuthiwa aphuma kwiFinancial Sector Conduct Authority (FSCA) okuthiwa athunyelwa okusolakala ukuthi badlala amabhanoyi, bayasatshiswa bese kuthiwa imali yabo izobanjwa uma bengakhokhi inhlawulo kaR200 000.
AbeFSCA bathe abanayo i-email ethi fscacommunications@gmail. com
IFSCA iphinde yaxwayisa umphakathi ngoTom Zambon, ozenza isazi sezimali. I-FSCA ithe uZambon akanayo imvume yokunika abantu usizo lwezimali.
Kuxwayiswe abantu ngokusebenza noMartin Sethole weNadex Investments (Pty) Ltd ngoba akanayo imvume yokunika abantu usizo lwezimali.
Kuthiwa uSethole uthi usiza abantu ukuhweba ngebinary futhi ubathembisa inzuzo kungakapheli amahora awu-48.
Kuthiwe abantu baqaphele neMoneyweb Private Bank ngoba ayivumelekile ukubanika usizo lwezimali.
Abantu bayacelwa ukuthi ngaphambi kokutshala imali ezinkampanini ezithile babheke ukuthi zinayo yini imvume yokusiza abantu ngemali ngokushayela u-0800 110 443 noma bavakashele iFSCA ku-www.fsca.co.za