Owe-IFP ugxeka amakhansela abadube umcimbi
UMENGAMELI we-IFP, uMnuz Velenkosini Hlabisa ukhwele wadilika kumakhansela e-ANC asuse umbhikisho aduba umcimbi wemiklomelo yezindondo zabafundi nezikole zaseMsinga, ezenze kahle ku-matric. Lo mcimbi ububanjelwe esikoleni Ukukhanya koMsinga Special School ngoLwesihlanu.
UHlabisa obeyingxenye yalo mcimbi ehambisana nezikhulu zomnyango wezemfundo KwaZulu-Natal, uthe amakhansela awakhulile ngomqondo.
“Ngiqale ngathuka ngibona kusuka umsindo ngingaqondi ukuthi kwenzekani. Ngibonga amakhansela e-ANC asalile angabaseka ozakwabo abadube umcimbi. Lokhu enikwenzile makhansela asalile, kukhombise ukuthi nikhulile ngomqondo nakwipolitiki. Besingekho isidingo sokuduba umcimbi othinta ezemfundo ngoba imfundo eyethu sonke akukhathalekile ukuthi ukuliphi iqembu. Ngisho uMntwana waKwaPhindangene noMadiba (Nelson Mandela) babekhuluma ngezwi elilodwa ngezemfundo ngenxa yokubaluleka kwalo mkhakha,” kusho uHlabisa.
Kuphinde kwananela nezikhulumi ebezikulo mcimbi eziveze ukuthi zizowathathela izinyathelo amakhansela adubile njengoba engaphansi kwazo eminyangweni kahulumeni eMsinga.
Ukuduba kwala makhansela kuze kwavula nesikhala kubantu abebefakwe ohlelweni ukuthi bakhulume kulo mcimbi njengoba kuhambe nokhulumela inyunyana yothisha edlelana ne-ANC, iSadtu obezokhuluma.
Isikhala sivalwe ngelungu lesigungu esibhekelele ukusebenza kwezikole zaseMsinga
Eluleka abafundi nothisha uHlabisa, uthe ulindele ukuthi izinga lokuphasa kuka-matric eMsinga, linyuke lifinyelele ku-80% kuya phezulu kulo nyaka njengoba kuphaswe ngo-74.1% ngo-2019.
Kuvele nokuthi izikole zaseMsinga yizona eziphase kakhulu ngaphansi kwesifunda uMzinyathi.
UHlabisa uphosele inselelo imeya yaseMsinga uNkk Buyisiwe Ngcobo, wathi kulo nyaka kuzomele ithungathe umfundi oyedwa ozimisele ngokufundela ubudokotela ezikoleni zakule ndawo. Ngonyaka ozayo uthe kumele ithungathe omunye ozofundela ubunjiniyela ozomenyezelwa ngo-2021.
Imeya yaseMsinga, uNkk Ngcobo, ithe ijabule ngokuthi kunoshintsho nasesikoleni iMayizekanye High okungaphasanga noyedwa umfundi wakwa-matric ngo-2018.
“Sathola ukuthi ukufeyila kwabafundi kulesi sikole kudalwa abazali. Kukhona abebevele batheleke esikoleni ngesikhathi sokufunda bethwele amakesi kabhiya abawudayisayo bakhiphe abafundi babathume ukuthi bayothenga amakesi kabhiya abawudayisayo. Ngathatha isinqumo sokuyokhuluma neLiquor Board eyabuya yazoluleka abazali bezingane ezifunda eMayizekanye ngokubaluleka kokufunda nokuthi bangaphazanyiswa abafundi ngesikhathi sesikole. Ingakho namhlanje (ngoLwesihlanu) ngithathe isinqumo sokuhlonipha lesi sikole ngendondo ekhethekile njengoba sekuphaswa nakhona,” kusho imeya uNkk Ngcobo.
Abafundi banikwe amaLaptop, imali, Overhead Projector, izitifiketi nezindondo.