IBasetsana idlule kukubi kwiZambia kowokuhlungela
IQEMBU lebhola lesizwe lamantombazane aneminyaka angaphansi kuka-20 laseNingizimu Afrika, kuzomele lizibambe ziqine emzuliswaneni olandelayo wokuhlungela iNdebe yoMhlaba, lapho lizobe libhekene nomakhelwane iBotswana ngenyanga ezayo.
IBasetsana igcine idlule ngo 4-2 kwiZambia ngemuva kokubambana ngo 2-2 e-Orlando Stadium ngoMgqibelo ntambama.
Elakuleli belize kulo mdlalo lihamba phambili ngo 2-0 womlenze wokuqala.
Ukudlala neBotswana akusiyona into encane, uma kubhekwa ukuthi labo makhelwane baya ngokulikhuphula izinga kwezikanobhutshuzwayo wabesifazane.
Iqembu lika-Under 20 alikaze liye kweyoMhlaba. INdebe yoMhlaba izobanjelwa ePanama naseCosta Rica ngoAgasti. Iqembu elidala lakuleli iBanyana Banyana alilibhadi nje kuma-Olympic eJapan kulo nyaka, kungenxa yayo iBotswana ebawashise ijezi kuhlungwa.
Labo makhelwane babhaxabule iNamibia ngo 9-0 uma sekuhlanganiswe imilenze emibili.
Umqeqeshi weBasetsana uJabulile Baloyi, uthe bazohlala phansi bahlele ukuthi bazoyimisa kanjani le midlalo elandelayo.
Akuphawulile yindlela abavimba ngayo abadlali bakhe.
“Ngiyalincoma iqembu uma ngibheka lokhu esikwakhayo. Ukubuya kwethu kabili kukhombisa ukuthi siqinile. Sinesiqiniseko sokuthi sizodlala neBotswana. Umdlalo wokuqala uzoba sekuhambeni. Kumele siqinise emuva bese sibheka ukuthi yimaphi amasu esizoqhamuka nawo ekhaya nasekuhambeni,” kusho uBaloyi kwiSafa.net.
Uvumile ukuthi akuhambanga ngendlela abebefisa ngayo emdlalweni neZambia. IChipolopolo encane ilibone kuqala ipali kwadingeka ukuthi amantombazane abuye emdlalweni. USiomala Mapepa ubeke izivakashi phambili kwathi uChelsea Daniels washaya elokulinganisa. Kuthe kusenjalo iZambia yabuye yahamba phambili ngegoli lika-Oseke Lubanji kwathi uZekhethelo Vilakazi washaya eleBasetsana elesibili.
“Besingafuni ukuthi beze kithina. Siwatshelile amantombazane ukuthi kumele kube yithi esiqala ngamandla kodwa basifakele ingcindezi ngamabhola amade balithola igoli. Kusize ukuthi sinciphise isigqi somdlalo ngokugcina ibhola ukuze sikwazi ukushaya igoli.”