Umuzi kaMshengu uzoba yigugu lezwe
OYINHLOKO yezamaPaki, ezokuNgcebeleka namaSiko kuMasipala weTheku, uThembinkosi Ngcobo, uveze ukuthi bahlela ukwenza umuzi kaJoseph Shabalala isikhungo samagugu.
UThembinkosi ukusho lokhu ngoMgqibelo ePlayhouse, ekhuluma ngezinhlelo abanazo kulo nyaka zokugcina amagugu.
“Izingxoxo zethu nomndeni wakwaShabalala seziya ngasemaphethelweni. Singumasipala sihlele ukuthi indlu kababa uMshengu le eseClermont, siyishintshe ibe yindawo ezogcina amagugu abheka umlando weqembu iMambazo nokuthi isuka kuphi. Awuzogcina lapho uzoqhakambisa nezindondo leli qembu elake lahlabana ngazo, okuhlanganisa amaGrammy Awards,” kuchaza uThembinkosi.
Uthe uMshengu yiqhawe okungamele lilibaleke kalula njengoba izinhlelo ziziningi abafuna ukuzenza ezithinta yena.
“Ngeke sigcine kubaba uMshengu kuphela sizoshintsha umuzi kamama nobaba uMxenge oseMlazi nawo siwenze umuzi wamagugu. Konke sikwenza lokhu ngenxa yokuthi eminyakeni ezayo kube khona izinto esizibukayo, siziqhenye ngazo ngokuthi ngezethu esizenzele zona ngezandla zethu. Izinto eziningi manje esizibukayo ezingumlando zenziwa ngabamhlophe, abafika bebancane kuleli kodwa manje asebenomnotho omkhulu kunathi banikazi bezwe,” kuchaza uThembinkosi.
Uthe okunye okusezinhlelweni zabo wukuyolungisa amathuna amaqhawe eChesterville, lapho okulele khona uSenzo Meyiwa ithuna lakhe nalo elizolungiswa ukuze kube nomlando oxoxwayo ngalo.
UMshengu ungcwatshwe ngoMgqibelo eMnambithi njengoba edlule emhlabeni emasontweni amabili adlule ngemuva kokugula isikhathi eside.
Uhlonishwe njengeqhawe njengoba asungula iLadysmith Black Mambazo, ehlonishwa umhlaba wonke.