Akukho okutheni ngezinguquko zeGagasi
AZIKHO izinguquko ezitheni ezilindeleke kwiGagasi FM njengoba seziqalile izigcawu zokuthi abaphathi bahlangane nabasakazi.
Ngokuthola kweSolezwe, iGagasi FM selizokwenza izinguquko zalo ngo-Ephreli hhayi ngoJuni njengakweminyaka edlule.
Ngonyaka odlule nokho izinguquko zaqala ngoMeyi.
Ngokusho komthombo lokhu kungenxa yokuthi abaphathi bakhathele wukushiywa ngabasakazi bengazenzi izinguquko zabo.
Ngonyaka odlule lesi siteshi sishiywe nguMzokoloko owayengena ekuseni wajoyina uKhozi FM ngo-Ephreli. Kushiye futhi neKings of the Weekend uSphectacula noNaves ababengena ngo-3 kuya ku-6 ntambama bayothatha isikhathi esifanayo kwiMetro FM. Omunye ohambile nguKing Sfiso osekuKhozi FM.
Okhulumela isiteshi uKhulekani Shandu, uvumile ukuthi izinguquko sebezozenza ngo-Ephreli.
“Lesi yisinqumo esisithathe njengesiteshi hhayi ngenxa yokuthi sihanjelwa ngabasakazi ngo-Ephreli,” kusho uKhulekani.
Umthombo uthe abasakazi abaningi banezinkontileka zeminyaka emibili zezinhlelo ngakho azikho izinguquko ezitheni ezilindelekile ngoba u-2020 wunyaka wesibili.
Uthe futhi uDJ Lab usezoba ngumdidiyeli wohlelo lwasekuseni phakathi nesonto iThe Uprising.
UDJ Laba wethula uhlelo iThe Fresh Cut no-Asante ngoMgqibelo ngo-7 kuya ku-10 ebusuku.
UKhulekani uthe ngeke aphawule ngendaba yezinkontileka.
“Ngeke siphawule futhi nangezinguquko kodwa engingakusho ukuthi seneme ngezinhlelo zaphakathi nesonto. UDJ Lab uyobamba ekuseni njengomdidiyeli. Khumbula uNjabs akasesiyena umdidiyeli kodwa ubambisene noFelix njengomethuli. Umdidiyeli u-Amanda uzohlaba ikhefu lokuyobeletha,” kusho uKhulekani.