Ababili ecaleni lokudlwengula intombi nto
KUBOSHWE isihlobo nomakhelwane ngecala lokudlwengula bese kubulawa owesifazane (20) obeyintombi nto eMashesheni, KwaMolefe, eNquthu, ngoMgqibelo ebusuku.
UNksz Nomvula “Juba” Buthelezi (20) kusolakala ukuthi udlwengulwe wumzala wakhe nomakhelwane beshintshana ngaye base beyambulala.
Kuthiwa bekunomcimbi wokucela umshado kubhuti wasemndenini ohlala emzini ongumakhelwane. Emva komcimbi uNksz Buthelezi uhambe namanye amalungu omndeni ebusuku beya esitolo beyodlala izingoma ku-jukebox.
Babuye behlukana ngezindlu zokulala ngoba kuthiwa umufi ubelala nonina. Kuthiwa uhlaselwe eya egunjini alala kulo, bafike bamklinya base bemhudulela kwenye indlu bamdlwengula maqede bamumboza ubuso bemncisha umoya waze wafa.
Kuthiwa bamlalise embhedeni kuhle komuntu ozilalele nje.
Umzala kamufi kuthiwa ubuyele endlini ahlala kuyo wabonwa unina egqoke ibhulukwe ebeligcwele igazi ngaphambili wazitshela ukuthi ubelwa ngoba kade kunomcimbi.
Unina kamufi kuthiwa ubone ngophaqa nesikhindi sangasese kukaNksz Buthelezi kuphansi kunomaka womuntu obehudulwa phansi. Balandele lo maka baze bayongena endlini ebekulaliswe kuyo umufi. Embhedeni nasebuntwini bakhe bekugcwele igazi isiketi abesigqokile sikhushuliwe.
Kubizwe amaphoyisa ngeSonto emuva kokuthi kube nezinsolo zokuthi umzala uyathinteka, afike amhloma ngemibuzo ase embopha. Izolo ekuseni abuye azobopha umakhelwane ngenxa yokuqina kwezinsolo zokuthi ubengeyedwa egila le migilingwane.
Kuthiwa lokhu kwenzeke izulu lina kungezwakali kwezinye izindlu obekwenzeka. Kusolwa ukuthi ababoshiwe bebephuzile.
UNgqongqoshe woMnyango wezokuThuthukiswa koMphakathi KwaZulu-Natal, uNkk Nonhlanhla Khoza, uzwakalise ukushaqeka nokudabuka ngokudlwengulwa bese kubulawe owesifazane.
Okumphathe kabi kakhulu wukuthi ubulawe ngabantu abesondelene nabo obekulindeleke ukuthi bamvikele.
“Abesifazane abaphephile uma kuwukuthi abantu okumele ngabe bayabavikela bayabahlukumeza bababulale. Kusithoba amanxeba ukuthi abasolwa baboshiwe, asifuni banikwe ibheyili kepha ababolele ejele. Asifuni kube nokusolana emndenini, akudedelwe umthetho wenze umsebenzi wawo,” kusho uNkk Khoza.
Unxuse abazali ukuba bahlanganyele ekukhulisweni kwezingane zabafana bazifundise ngokuvikela kwabesifazane futhi baziqhelelanisa nodlame olubhekiswe kwabesifazane.
Okhulumela amaphoyisa KwaZulu-Natal, uColonel Thembeka Mbele, uthe kuvulwe icala lokubulala kwaboshwa indoda eneminyaka ewu-35 ngeSonto.
UColonel Mbele uthe yimiphumela yokuhlolwa kwesidumbu ezocacisa ngembangela yokufa kukaNksz Buthelezi. Uthe indoda kulindeleke ukuba ivele eNkantolo yeMantshi yaseNquthu namhlanje.