Bahleli lubhojozi ngokubulawa kwabomndeni belandelana
UHLALELE ovalweni umndeni wakwaMvubu Ezitholeni KwaNyuswa, emva kokubulawa ngokudutshulwa kwendodana yakhona, kusaphele amasonto amabili kubulawa uyise ngendlela efanayo.
UMnuz Mlungisi Mvubu obengumpheki udutshulwe ngabantu abangaziwa esekameleni lakhe ngeSonto ebusuku. Kusaphele amasonto amabili kubulawe uyise, uMnuz Vusimuzi Mvubu, odutshulwe ehleli nomndeni wakhe ekhaya.
Ilungu lomndeni elicele ukuba lingadalulwa ngoba lesaba ukubulawa, lithe sebesaba nokulala ngemuva kwalezi zigameko ngoba abazi ukuthi wubani ozolandela.
“Ubaba ubengumuntu osemdala, ezelusela izinkomo nezimbuzi futhi engenaso isitha. Amadoda amabili angena ezomdubula, akazange asho lutho, agcina ngokuthi akavule, aphula izicabha angena amdubula. Kulesi sigameko kwadubuleka nengane kamfowethu eneminyaka eyisikhombisa eyayilele embhedeni. Kukhishwe izinhlamvu eziyisithupha emzimbeni wayo. Umfowethu yena ubefika nje ephuma emsebenzini lapho ewuchef khona, engakakhumuli. Kwafika abantu abadubule amaglobe endlini elala abesilisa, maqede baphula izicabha bangena ekameleni lakhe, bamdubula washona ekhona lapho. umfowethu obekwelinye ikamelo osindile, uthi akukho okushiwo abahlaseli bavulele ngenhlamvu kuphela. Ukube sinayo indlela ngabe siyabaleka endaweni, manje asazi ukuthi sizobaleka sibheke kuphi,” kusho owomndeni.
Inkosi yendawo uMdingiswa Ngcobo, ithe ukubulawa kwabantu ngesibhamu endaweni sekuvamile. Ngaphandle kwalo mndeni kunomunye umuzi oqhele ngamakhilomitha amabili nawo ohlaseliwe ngalo iSonto ebusuku kodwa ngenhlanhla obehlaselwa ukwazile ukulwa nabahlaseleli babaleka.
“Njengamanje thina njengabaholi asazi ukuthi singathi iyini imbangela yokubulawa kwabantu bakwaMvubu. Kodwa kuyacaca ukuthi sikhona isizathu. NgoMgqibelo bese ngike ngakhuluma nezinduna, ngithi kumele kube nembizo sizokhuluma ngokubulawa kwabantu ngesibhamu siyisizwe. Bekusahlanganiswa ukuthi kuzohlanganwa nini njengoba sekudutshulwa omunye umuntu kulo mndeni. Sisazama ukuthi kukhulunywe namaphoyisa ukuthi ugadwe lo mndeni uze ufihle, ngemuva kwalokho kuqhanyukwe nesu lokuthi uzophephiswa kanjani,” kusho inkosi.
UCol Thembeka Mbele, okhulumela amaphoyisa KwaZulu-Natal, uthe amaphoyisa aseHillcrest aphenya amacala amabili okubulala nelokulinyazwa kwengane. Uthe imbangela yokudutshulwa kwabo ayikaziwa.