Bagqigqela ize kujame imishini
KUPHAZAMISEKE ukusebenza emahhovisi oMnyango wezaseKhaya, asemgwaqweni uMngeni, eThekwini, ngenxa yokujama kwemishini izolo okuthiwa kuqale ngesonto eledlule.
Abantu bebemi ujenge kolayini abade belinde umnyama ongenafu ngethemba lokuthi hleze isebenze imishini, basizakale.
Abanye bebedikila bephuma sebedemalayisa, bekhalela ukumosha imali abagibele ngayo, isikhathi futhi sebejuqwa yinkemane.
UNksz Sibongile Ngcobo waseMatikwe eNanda, uthe kusukela ngoLwesihlanu ugqigqa kula mahhovisi, ahlale usuku lonke angasizakali.
Uthe ubezoshayela umazisi umzukulu wakhe ofunda u-matric ngoba uyafuneka esikoleni.
“Ngifika ekuseni ngihlale kuze kushaye u-4 ntambama, kuvalwe phambi kwami kulawa mahhovisi ngingasizwanga. Sitshelwa wonogada ukuthi ayikho i-network, imishini ijamile futhi abazi izosebenza nini. Silambile, sisebenzise imali yokugcina ukuzohlala sibukane kulawa mahhovisi,” kusho uNksz Ngcobo ngokukhathazeka.
UMnuz Mduduzi Vezi (61) waseFernin, eClermont, uthe ngoLwesihlanu bangeniswa ngaphakathi emahhovisi kodwa bahlaliswa usuku lonke bengasizwa.
UVezi ubezoshaya umazisi emuva kokuwulahla emasontweni amabili edlule.
“Impilo imile, ipasi anginalo ngiyalidinga. Ngigqigqela ubala emahhovisi. Asikalilahli ithemba yingakho sihlezi mhlambe izosebenza khona sisalindile imishini,” kusho uVezi.
Kunabantu abebenikwe amathikithi anezinombolo ngoLwesihlanu, batshelwa ukuthi kuzoqalwa ngabo izolo kodwa bagoduke bengasizikalanga. Laba bantu bakhala nangokuba nonya konogada abakhuluma umathanda nabo. Kunephepha eliphanyekwe esicabheni elinesaziso ukuthi kuzoncishiswa amahora okusebenza kulawa mahhovisi.
Omunye wesifazane ongathandanga negama lakhe, uthe kusukela ngoLwesithathu ugqigqa kula mahhovisi. Uthe uvala ibhizinisi aziphilisa ngalo ezoshaya umazisi kodwa akasizwa. Uthi uyalimala emalini ngoba amakhasimende akhe azomshiya ezitshela ukuthi akasadayisi kanti uhlalele ubala.
Imenenja yalo mnyango KwaZulu-Natal, uMnuz Cyril
Mncwabe, uthe inkinga yokujama kwemishini yenzeka eNingizimu Afrika yonke. Uthe imishini iyasebenza iphinde icime, akukhona nje ukuthi kume nse yonkinto.
“Inkinga kazwelonke kodwa abezobuchwephese bayayilungisa. Sisalinde ePitoli basitshele ukuthi idalwe yini inkinga futhi izophela nini,’ kusho uMncwabe.
Ngesikhathi sebhizi kaDisemba amahhovisi abevalwa ngo-7 ebusuku. Izolo bekunesaziso ukuthi azoncishishwa amahora okusebenza kusukela ngoFebhuwari 24 kuya kuFebhuwari 28 nonyaka.
UMncwabe uthe amahora okusebenza u-8 kuya ku-4 ntambama.
“Kuziqondalene ukujama kwemishini okuqhubekayo nokuncishiswa kwamahora okusebenza. Besinohlelo oluyisipesheli sivala u-7 ebusuku ngoba bekunebhizi, sisebenza umthamo wabantu abaningi. Abasebenzi basebenze kwaze kweqa amahora okumele bawasebenze manje sinciphise isikhathi khona bezothatha isikhathi sabo,” kusho uMncwabe.