Inkohlakalo izoba wumgoqo ovimbile kuMboweni
YIZE kulindeleke ukuthi uNgqongqoshe wezeziMali, uMnuz Tito Mboweni, ajabulise wonke umuntu uma esethula isabelomali ePhalamende kusasa kodwa iqiniso wukuthi akusiye wonke umuntu ozochazeka ngenkulumo yakhe. Eqhulwini lezizathu zalokhu wumnotho wezwe ongakhuli ngendlela okulindeleke ngayo.
Amazwe amaningi esesimeni esifanayo ngenxa yezizathu ezahlukene kodwa kuleli inunu enkulu eyenza kungayeki phambili yinkohlakalo.
Ubufakazi benkohlakalo, wukudonsa kanzima kwezinkampani zikahulumeni okubalwa kuzo i-Eskom, SAA, Post Office, Transnet nezinye.
Ziningi izibonelo zokungaphathwa ngendlela kwemali ezinkampanini zikahulumeni njengesivumelwano sezigidi se-Eskom neTegeta esinqanyulwe yiSIU enkantolo ngeledlule.
Esinye isibonelo wumbiko wezimali weSAA oyihlazo, osekunzima ukuba unekelwe umphakathi.
Zonke lezi zinkinga sezijike zaba nesandla ekucindezeleni umnotho ukuthi ukhule ngendlela elindelekile.
Okunye, uhulumeni uzandisele umthwalo ngemfundo yamahhala njengoba kunobuhixihixi obuningi ezikhungweni zemfundo ephakeme.
Yingakho ongoti bezomnotho bevumelana ngokuthi uMboweni uzokwenza impilo ibe nzima kakhulu kubantu ezweni. Izazi zithi naye uzokube engazenzi kodwa ezama ukugwema ukuthi izinkampani ezihlola umnotho wamazwe zingafaki izwe kwinzikamnotho.
Ngenxa yalokhu, kubhekwe ukuthi amemezele ukunyusa imali efakwa uma uthenga impahla - iVAT ngo-1%.
Kuthiwa ungqongqoshe unezinto ezintathu angazenza – ukunyusa intela yabantu, eyamabhizinisi neVAT.
Ngakolunye uhlangothi izinyunyana seziqalile ukumgquza ngokuthi angalokothi adlalele kwiVAT. Zithi abantu bavele bathwele kanzima njengoba kuhlale kucishwa ugesi ngenhloso yokuwonga.
Okunye okuthanda ukuba wumnqansa wukuthi enyuse intela yezinkampani njengoba uhulumeni esabheke ukudoba abatshalimali bakwamanye amazwe.
Ekugcineni, okumqoka okubhekwe kakhulu wukuthi njengoba kuhlale kushunyayelwa ivangeli lokuthi makongiwe imali - kungaba kuhle ukuthi lokho kuvele nakwisabelomali.