Qikelela ukuthi izeluleko uzithatha kobani emsebenzini
ETOHWENI
INGOSI yanamuhla ngiyibhekise ikakhulu ebantwini abasebasha endimeni yomsebenzi. Kungaba yilabo abasanda kuqeda ukufunda base beqala ukusebenza, kungaba yilabo abahlale isikhathi eside bengawutholi umsebenzi kwase kugcina kulunga. Nakuba udaba engilubeka esithebeni kuyinto okumele iqashelwe yiwo wonke umuntu osebenzayo, lubaluleke kakhulu kulabo abangenaso isipiliyoni esiningi emsebenzini.
Uma kusetshenzwa kuba nabantu ogcina ujwayelene nabo. Ikakhulukazi uma usemusha endaweni yokusebenza uyaye ufise ukuthi usheshe ubajwayele abantu ukuze usizakale kokuningi okusuke kusekusha kuwe. Inkinga-ke iqala ngokuthi ungabakhethi ngokuqikelela abantu obafaka ephakatheni. Vele kulukhuni ukuthi ukwenze lokhu ngoba usuke ungakabazi ozakwenu.
Ngebhadi lakho akusibo bonke obafaka ephaketheni abazoba wusizo kuwe. Kubona kukhona abazokufundisa izinto ezifanele kanti kukhona nabazokufundisa imikhuba yabo engasile, bangabi nawo namahloni okuthi phela kuwena inkonyane isathuka isisinga, bavele bafune ukukufaka ngekhanda ezintweni ezingasile. Imikhutshana yabo engasile kungaba ukusheshe uhambe singakashayi isikhathi; ukufika ngemuva kwesikhathi, ukungalubhadi emsebenzini uma kuwuMsombululuko noma kuwusuku olwandulela noma olwandulelwa yiholidi, ukuhleba ngozakwenu nabaphathi, noma ukuba nenhlese yokudelela, neminye imikhutshana engasile.
Wena mafikizolo emsebenzini, qaphela. Bafundisise abantu kuthi uma ubona ukuthi uzakwenu othile unobugwegwe uyihluzisise into ayishoyo ukuze angakufaki ogibeni. Qaphela ukuthi bangalwi izimpi zabo nozakwabo noma nabaphathi babo ngokusebenzisa wena - awuhlangene naleyo nxushunxushu. Zifundise ukusho ngomlomo wakho ukuthi “cha, mina angiboni kanjalo!”
Le nhlobo enobugwegwe ayiliyeki ithuba lokukhuluma kabi ngabanye bese ilindela ukuthi nawe uhambisane nemibono engasile. Ayiliyeki ithuba lokuphendula ibhekise le lapho ilungiswa. Ayiliyeki nethuba lokukuhlohla ngezaluleko ezingakhi. Konke lokhu kubuke bese uyacabanga ukuthi kuzolakha yini igama lakho?
Ngisho ngabe lowo muntu wuye okumele akufundise umsebenzi, akusho ukuthi mlalele noma esekufaka enkingeni.
Kujwayelekile ukuthi uzakwenu okunguye okumele ekufundisa umsebenzi ugcine usumhlonipha, umethemba futhi usumkhonzile. Nokho ukuthi unolwazi lomsebenzi olusezingeni eliphezulu akusho ukuthi uwungoti kukho konke. Masizifundise ukuthi abantu abathile bakhona empilweni yethu ukusifundisa okuthile, hhayi konke esidinga ukukwazi.
Akuvamisile ukuthi umuntu oyedwa abe nekhono lakho konke odinga ukukufunda. Isibonelo nje, kungenzeka uzakwenu osekhulile ofikele kuye emsebenzini abe nekhono elisezingeni eliphezulu lobuchwepheshe bomsebenzi, kodwa uthole ukuthi akakwazi nhlobo ukuphatha imali, ukweleta wonke umuntu emsebenzini.
Lokhu kusho ukuthi uma ufuna ubuchwepheshe bomsebenzi uzofunda kulo zakwenu, uma ufuna ukwazi ukuthi imali iphathwa kanjani uzobheka engxenye.
Nasempilweni yangaphandle komsebenzi uyakhetha ukuthi uzithatha kubani izeluleko, kanjalo nasemsebenzini kukhona abantu okuzomele ubalalele nje ebese ushiya kanjalo. Qaphela futhi ukuthi uzakwenu ojwayelene naye kakhulu udume ngani emsebenzini.
Uma edume ngezinto ezingasile, uqaphele-ke ungabhecwa ngobende inyama ungayidlanga ngoba nakhu ningabangani nomuntu owuhlupho.
Kokunye umuntu osemusha emsebenzini ufakwa ehlathini wozakwabo asebemnkantshubomvu. Kokunye kuyenzeka abantu abasebasha emsebenzini bahlomekisane bodwa, bese uyaxakwa nje ukuthi indlela abayibuzi ngani kwabaphambili.
Wawuwedwa ufaka isicelo somsebenzi, nasemsebenzini wafika wedwa, musa ukufakwa ehlathini abantu obafice emsebenzini. Okwakho ukufunda umsebenzi, ufunde nendlela yokuziphatha.
Uma kunguwe ofaka abanye ehlathini ngeziyalo, izenzo nezinkulumo ezingakhi zibuze ukuthi ukube umntanakho lo noma ukube umuntu wakini ngabe uyathanda yini ukuthi kube khona umuntu omfaka ehlathini emsebenzini?