UFrosler unethemba ngeseligi
UMDLALI wasemuva kwiKaizer Chiefs, uReeve Frosler, cishe nguyena yedwa osawukhumbula kangcono umuzwa wokuba ngumpetha.
Kumasizini amabili edlule uFrosler ubekwiBidvest Wits inqoba isicoco se-Absa Premiership. Abanye ozakwabo kwiChiefs sekuphele amasizini amane bebhuqwabhuqwa yisomiso sezindebe.
I-Chiefs yagcina ngo-2015 ukuwina indebe ngeligi. Kusukela lapho ithwele kanzima uma kuziwa ezinkomishini.
Ngemuva kokuwashiswa ijezi ngempelasonto edlule ikhishwa yiHighlands Park kwiNedbank Cup Last 16, sekumele ibambelele endaweni yokuqala ehleli kuyona kwi-Absa Premiership.
I-Chiefs ihleli endaweni yokuqala kwi-log lapho ivule igebe lamaphuzu amane kwiMamelodi Sundowns enamaphuzu awu-41.
Endaweni yesithathu kulandela izimbangi zayo ezinkulu, i-Orlando Pirates ezinamaphuzu awu-39.
NgoMgqibelo uFrosler nozakwabo kuzomele bazame ukubuyela ekuwineni ngemuva kwemidlalo emibili bengatholi imiphumela emihle.
I-Chiefs izotholana phezulu nePirates kowabakhaya baseSoweto eFNB Stadium ngo-3.30 ntambama.
Ngaphambi kokubhekana neHighlands Park, iphucwe yiMaritzburg United amaphuzu amathathu koweligi.
Yize izinto zibukeka zilutsheku kwiChiefs okwamanje osekulokhu kuqale unyaka ingawubambi umgqigqo wokuwina njengasemzuliswaneni wokuqala weligi, uFrosler usenethemba lokuthi bazokwazi ukuyibamba eqhulwini kuze kufike ekugcineni.
“Kuhlezi kukuhle ukudlala phambi kwenkundla egcwele phama. Lokhu kuyakugqugquzela kukwenze ufune ukwenza kangcono,” usho kanje uFrosler ngaphambi kokuthi badlale neLions of the North. Kulo mdlalo amathikithi abethengwe aphela futhi abalandeli bangadikibala noma imvula isiyishaya. Kulindeleke ukuthi naseFNB kugcwale phama njengoba amathikithi omdlalo asadayisa aphela.
UFrosler odlala kwesokudla emuva ubengekho ngempelasonto edlule, okungenzeka ukuthi umqeqeshi u-Ernst Middendorp, ubemgcinile ngoba enamakhadi amathathu aphuzi, obekungenza aphuthwe umdlalo wabakhaya ukube ubethola elinye ikhadi.
Phakathi kwezinto ezibalulwayo ngokuba nomgqigqo ongemuhle kweChiefs emzuliswaneni wesibili weligi, wukuthi amaqembu aseyayiqonda indlela edlala ngayo.
“Ngicabanga ukuthi kulesi sigaba sesizini sesiyazana ukuthi imbangi iphetheni. Kumele siqinise kakhulu kulokhu okusisebenzelayo. Awufuni ukushintsha kakhulu. Okudingayo wukuthi uzethembe ngokuthi lokhu obukwenza kuyakusebenzela uqinise kukhona.
“Iligi icinene ngeke uthi unegebe elikhulu. Ihlezi injalo. Akekho osuke eqinisekisiwe ukunqoba. Okwethu wukubhekana nomdlalo ngamunye. Ngithemba ekugcineni sizoyithola impumelelo,” kusho uFrosler.