OwoMvoti ufuna ukuqeda ishobolo lakhe kweyokuhlunga
UDOCTOR Mkhonza oqeqesha Umvoti United ubambe umoya ngokuqeda ishobolo lokungenzi kahle emidlalweni yokuhlungela ukunyukela kwiGladAfrica Championship.
NgeSonto , ezikaMkhonza odlale eminyakeni edlule emaqenjini anjengeMoroka Swallows, Bush Bucs, Free State Stars nakwiAfrican Wanderers, zishaye ngo 1-0 iRainham Sporting emdlalweni obuseWorkington Ground, eGreen Wood Park Stadium, eThekwini.
Lo mphumela uqinisekise ukuqhubeka nokuzihola phambili ngamaphuzu angu-51 emuva kwemidlalo ewu-21. Leli qembu elingawazi umpetshisi selokhu iqalile isizini ka-2019/20, limiswe kabi yiKwaDabeka Sporting ebhaxabule iNatal United ngo 3-1 kobuse-KK Stadium, eClermont. UMkhonza utshele Isolezwe ukuthi asekulindile ukuthi azishayele yena iKwaDabeka ngoMashi 7 khona ezokwazi ukuphefumula.
Uthe ngesingaye ozonqoba lo mdlalo uyena ozoya kweyokuhlunga.
Lo mqeqeshi, oseye kweyokuhlungela ukunyukela esigabeni esiphezulu amahlandla amane, uveze ukuthi isifiso sakhe kulokhu wukuqeda ishobolo lokungenzi kahle kule midlalo.
Ngo-2005 nango-2006 uhambe nabaQulusi ukuya kweyokuhlunga ebiseMgungundlovu naseFree State. Ngo-2008 ufake iScicilian yangakubo eNewcastle kweyokuhlunga ePort Elizabeth. Ugcine ngamaJuba ngo-2012 ukuya eGoli.
Esengikuthandazela wukuqhubeka nomgqigqo omuhle kwabafana bami.
Ngendlela abenza ngayo ngibona kulokhu ngizoliqeda ishobolo lokuhlale ngingenzi kahle kweyokuhlunga,” kubeka uMkhonza.
Sisekuzo eze-ABC Motsepe League, ngoLwesithathu iHappy Wanderers izobhekana neGWP Friends emdlalweni ozoqala ngo-3, eSouth Coast Academy.
I-Wanderers eqeqeshwa uWalaza Ndwandwe ngokubambisana noThulani Zaca ngeledlule itshengise ukuba yingozi, ishaywa ekugcineni yiTS Sporting eyibamba kwiGladAfrica ngo 4-3 koweLast 16 Nedbank Cup, ePrincess Magogo Stadium.
Njengamanje leli qembu lasePort Shepstone kwi-log lisendaweni yesine ngamaphuzu awu-37 emuva kwemidlalo ewu-18.
Omunye umdlalo ngalolu suku uphakathi kweSummerfield neMuzi King Masters ngesikhathi esifanayo eChatsworth Stadium. ISummerfiled ikweyesithathu ngamaphuzu awu-45 emuva kwengu-20, bese iMuzi ilale kweyesishiyagalombili ngawu-26 emuva kwewu-19.
Imiphumela ye-ABC Mtsepe League:
Edendale Juventus 1-1 Friends; Milford 1-0 Warrios; Experiencs 3-1 Movers; Umvoti 1-0 Rainham; Qwabe 1-0 Natal Rich Boys; KwaDabeka 3-1 Natal.