Uqweqwe luzwelana noDavid Notoane
UMAKADEBONA ebholeni laseNingizimu Afrika uThabo Dladla, uzwelana nomqeqeshi weqembu lesizwe lika-Under 23 uDavid Notoane njengoba ezakhe zizodlala kuma-Olympic azoba seTokyo maphakathi nonyaka.
Ngeledlule, uNotoane umemezele isikwati sabadlali abangu-78, azokhetha kusona abadlali abangu-23, azodlala ngabo kulo mqhudelwano ozoqala ngoJulayi 24 uphele ngo-Agasti 9.
Kulesi sikwati kukhona abadlali basemuva abangu-27, abasesiswini abangu-24 nabagadli abangu-19.
UDladla wayeyiphini likaEphraim “Shakes” Mashaba ngesikhathi iqembu lesizwe likaUnder 23 lishaya iBrazil kumaOlympic ngo-2000.
Ngokusho kukaDladla (osesebenza esikhungweni semfundo ephakeme i-University of KwaZulu-Natal eMgungundlovu), okwenza azwelane noNotoane wukuthi isimo sabadlali bakuleli asigculisi neze, ikakhulukazi uma kuzodlalwa imiqhudelwano esezingeni lomhlaba.
Engxoxweni kaDladla naleli phephandaba, ukubeke kwacaca ukuthi uNotoane unengcindezi enkulu ngoba imibono ihlezi iminingi uma kukhona ithalente eliningi ngale ndlela kuleli, kanti futhi nabathandi bebhola bafuna agile izimanga eTokyo.
“Ubhekene nomsebenzi onzima kakhulu uNotoane ngoba kufanele akhethe abadlali azogadla ngabo. Noma likhona impela ikhono kodwa ngeshwa akudlali lona kuphela emiqhudelwaneni yalolu hlobo. Okubaluleke kakhulu wukuthi ngabe ngokomqondo abadlali bethu bakulungele yini ukumelana namazwe asethuthukile kulo mdlalo kanobhutshuzwayo. Inkinga esabhekana nayo ngonyaka ka-2000 sinoMashaba, kwaba ngukuthi siyakhonya ezwenikazi i-Afrika, kwakulula ukuthi sihlungele ngempumelelo imiqhudelwano emikhulu. Inkinga yayiba khona uma sesidlala kuwona uqobo umqhudelwano, kucace ukuthi asikho esimeni esihle ngokomqondo, siyathuka bese singadlali kahle,” uqale washo kanje uDladla.
“Inkinga nje yokuqala esibhekene nayo wukuthi emaqenjini afana noChelsea, Liverpool, Villarreal, Paris SaintGermain namanye, kunabadlali abaneminyaka engaphansi kuka-21 asebedlala ngokugcwele emaqenjini amakhulu nakwiUefa Champions League. Ngeshwa emaqenjini akuleli asinabo abadlali abasebancane, asebelijwayele ijezi emaqenjini abo” kulandisa uDladla.
“Kuleli sineMultiChoice Diski Challenge (MDC) okuthiwa kuyona kufanele kudlale abadlali abaneminyaka engu-21 nangaphansi. Umbuzo enginawo nje ukuthi yini ndaba siqale phezulu kanje ngoba asinayo iligi yalolu hlobo ku-Under 19, 17, no-15. Baqhamukaphi laba badlali osekufanele badlale beno21? Bebedlalaphi ngaphambili,” kubuza uDladla.
“Kubalulekile ukuthi abadlali badlule kuzo zonke izigaba njengoba amanye amazwe enza. Isibonelo nje, ngo-1999 sadlala kwiNdebe yoMhlaba ka-Under 20. Sasiphethe oPatrick Mbuthu, Daniel Matsau nabanye abadlali abaningi. Ngiyakhumbula ukuthi iFrance eyagcina iwunqobile umqhudelwano yayidlala ngoNicolas Anelka,Thierry Henry, William Gallas nabanye abaningi. Buka-nje ukuthi abadlali beFrance bahamba ibanga elide kanjani ebholeni bagcina bedlalela namaqembu amakhulu emhlabeni,” kusho lolu qweqwe lo mqeqeshi.