Kulindelwe lukhulu kuNyatama

UBHEKE lukhulu umqeqeshi weHighlands Park, u-Owen Da Gama, kuMusa Nyatama ovalele phakathi iphenathi eweze ezakhe ngelibanzi emdlalweni weNedbank Cup Last 16 bewashisa iKaizer Chiefs ijezi ngempelasonto.

IHighlands izibekisele indawo kuma-quarterfinal alo mqhudelwano inqoba ngo 5-4 kumaphenathi.

UKhama Billiat ugeje iphenathi yeChiefs, kwathi uNyatama wayibeka phakathi eyakhe, yadlula kanjalo iLions of the North ngemuva kokuthi umdlalo uphele zibambene ngo 1-1.

UNyatama usayine kwiHighlands ngoJanuwari ngemuva kokuthi echithwe yi-Orlando Pirates. Ngamasizini adlule uNyatama, oyibamba esiswini ube ngomunye wabadlali abagqamile kweBucs. Kuthe kungafika umqeqeshi omusha, uJosef Zinnbauer, kwacaca ukuthi akekho ezinhlelweni zakha.

UDa Gama uthe ukuba nomdlali onesipiliyoni sikaNyatama kuzobazisa kakhulu.

“Kancane, kancane uyangena egiyeni. Ukhombisile ngephenathi, bekudingeka isipiliyoni sakhe nje kuphela. Nasemdlalweni ubengalishaya igoli kodwa akulula kumdlali ojoyina iqembu ngalesi sikhathi sesizini. Kumele aqale aqonde indlela yokudlala.

“Kodwa ungumdlali omuhle enkundleni nangaphandle kwayo, noma siziqeqesha kuningi asilethela khona. Siyabonga ukuba nomdlali osezingeni lakhe benoYeye (Reneilwe Letsholonyane). Laba badlali bafika nokuhlukile futhi uyabona ukuthi bayafuna ukudlala,” kusho uDa Gama.

IHighlands Park izibekisela indawo kuma-quarterfinal eNedbank nje, ike yaba nomgqigqo wemiphumela engemihle kwiligi ngemuva kokufika kowamanqamu weMTN 8.

Kodwa kubukeka sengathi imiphumela emihle isayayilandela njengoba isibuyelile emaqenjini alwela iTop 8 kwi-Absa Premiership. Ihleli endaweni yesikhombisa kwi-log.

UDa Gama uthe ujabulela ukuthi abadlali abebelimele sebebuyile futhi ufuna bakhohlwe wukushaya iChiefs, bagxile emdlalweni ozayo.

ILions of the North izodlala neLamontville Golden Arrows eSugar Ray Xulu ngoMgqibelo ngo3.30 ntambama.

“Lona umphumela omkhulu (weChiefs) kodwa kumele abafana baqhubeke nokuzithoba. Kumele sigxile kwi-Arrows esidlala nayo ekuhambeni, sikhohlwe yiChiefs. Kuzomele sisebenze kanzima.”

Ebuzwa ukuthi ngabe ubona le sizini ibe ngengcono kunedlule, uDa Gama uthe kuzomele balinde iqale isongwe.

“Ebesikufuna nje kule sizini wukwenza kangcono kunangesizini edlule. Asiqale silinde isongwe kuqala,” kusho umqeqeshi, okuke kwaba namahebezi athi uzoxoshwa ngoba iqembu liphikwa imiphumela.