Bezibuya esibhakeleni sabesifazane
ZIBHEME zakholwa izibukeli ebezithamele umqhudelwano wesibhakela wabesifazane samaamesha, obuhlelwe yikomiti labesifazane kwiKwaZulu-Natal Olympic Style Boxing Organisation noMnyango wezeMidlalo, ngeledlule eNewcastle.
Emqhudelwaneni obekungokokuqala wenziwa, isifunda esiziqwaqwade zonke emakhanda ngokuthola izindondo eziningi kube Amajuba, isibili yiTheku, isithathu sathathwa Umzinyathi.
Kweminye imiqhudelwano, Umkhanyakude uphume isine, King Cetshwayo, Harry Gwala, Umgungundlovu neZululand, uThukela noGu kwagcina iLembe.
Bekungabesifazane ngisho abaqeqeshi, amajaji nonompempe nezikhulu zasehhovisi.
Ngemuva kwezimpi kube nesithangami lapho obekucotshelelwana ngolwazi ezinhlakeni ezahlukene.
Ezihambelini, bekukhona uZandile Malinga ongumnikazi weStarline Boxing Promotions, Pretty Tsotetsi ongusihlalo kazwelonke weSanabo obephuma eMnyangweni wezeMidlalo.
Impi evotelwe njengeyosuku kube ngekaNakhiwe Mdletshe waseMgungundlovu, obelwa noNompumelelo Mhlongo wasoThukela.
Esigabeni esivulelekile, oshaye isibhakela esiqhwiza umentshisi kube uSanelisiwe Madonsela wasemaJuba, kumajuniya kwaba uNolwazi Vilakazi waseThekwini kuma-youth kwaba uThembelihle Hlongwa.
USandile Sibisi, ongusihlalo weKZN Olympic Style Boxing Organisation, utshele Isolezwe ukuthi inhloso ngezimpi wukugqamisa abesifazane futhi sezizoba minyaka yonke.
“Uma konke kuhamba ngononina eminyakeni embalwa ezayo sizokwanda isibalo samabhokisa ezinga eliphezulu aseKZN afana noNomusa Ngema waKwaMashu, Lerato Mathiba waseNewcastle nabanye asebemele kaningi iNingizimu
Afrika emiqhudelwaneni yomhlaba. Nakuba izoba khona imiqhudelwano ezoxuba ubulili kodwa sizoyandisa ezoba nabesimame kuphela. Ngesifanayo nakubaqeqeshi, amajaji, onompempe nakubasebenzi besifazane emahhovisi,” kubeka uSibisi.
Izimpi zangeledlule zilandela ebeziba khona eNewcastle zamaElite Championships, obekulwa kuzo amabhokisa aphakathi kweminyaka ewu-19 no-40.
USibisi uveze nokuthi ngoMashi 7, eNseleni ngaphansi kwesifunda iKing Ceshwayo, kuzoba nomqhudelwano wamaYouth Championships okuzolungiselelwa ngawo amaNational Championships azoba ngoJuni esifundazweni esisazomenyezelwa.
“Sizobe sesiba namakhempu okulungiselela amabhokisa ukuthi enze kahle kokazwelonke. Enye inhloso yethu wukuphinda senze kahle kuzwelonke. Ngaleyo ndlela sizokwanda isibalo samabhokisa angena eqenjini lesizwe. Izinga elitshengiswe abesimame ngeledlule linginike ithemba ngokufeza leli phupho.”
Nanxa zibukeka zihamba kahle izinhlelo zama-amesha eKZN kunamahlebezi athi kungenzeka iNingizimu Afrika iphinde ingabi nalo iqembu lesibhakela elizoya kuma-Olympic eTokyo, eJapan, maphakathi nonyaka. Kuthiwa lokhu kudalwa izinkinga ezixaka ukwenza kwiSanabo esingethe esama-amesha kuzwelonke.