Umasipala ufeze iphupho lomfana
UBONGA amandla eSolezwe umfana waseNkandla obeswele imali yokuyodlala emqhudelwaneni kanobhutshuzwayo ozoba se-Italy.
ULegder Biyela ongumnikazi weJuly Asilali Football Programme Academy okudlala kuyo uSiphile Nene (16), uthi ukube leli phephandaba kalilushicilelanga lolu udaba akazi nokuthi yena nabazali balo mfana bebezowuthatha kuphi u-R25 000 wezindleko zokumyisa kwiGalin World Cup Tournament ezoqala ngoEphreli 10 kuya ku-Ephreli 11 khona e-Italy.
UBiyela uthe ukuphuma kodaba kwiSolezwe kuthinte uMasipala waseNkandla wase uqoma ukumxhasa ngalo R25 000 ongase ushintshe unomphelo impilo kaSiphile.
Le mali ngeyamathikithi ebhanoyi, izindleko zokulala, ukudla nokusebenzisa imishini yokujima.
UBiyela echaza ngokuya kukaNene phesheya uthe ngasekupheleni konyaka odlule lo mdlali odlala ohlangothini lwesokunxele, uye kwinhlolokhono ebiseGoli ye-Empire Sports Academy yaseTanzania esebenzisana neJuly Asilali Programme.
Ngenxa yekhono lakhe ithimba labaqeqeshi lihlabeke umxhwele bamfaka eqenjini labadlali abawu-16 abazodlala kwiGalin World Cup Tournament. Nakuba engathandanga ukwanda uBiyela, ophinde abe wumhleli weJuly Asilalali Tournament okuzothi ngoJulayi ihlanganisa unyaka wesihlanu, uphinde waveza nokuthi ngakho ukushicilelwa kodaba lukaSiphile sekukhona nabanye abazimisele ukufaka esivivaneni.
UBiyela uthe obekumphatha kabi ukuthi uSiphile ubezophuthwa yithuba lokuya kulo mqhudelwano okuzobe kugcwele kuwo izinhloli zamaqembu adlala kwiSerie A.
THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.
Uthe uma uNene enze kahle kuwo uzosayina kwiEmpire Sports Academy enamagatsha amane eBrazil nasemazweni amaningi e-Europe.
“Ngiswele amagama okubonga kuMasipala weseNkandla ngokufeza isifiso sikaPhile.
Ngaphandle kwawo kasazi ukuthi besizoyithatha kuphi imali engaka.
Kungijabulisile ukubona umndeni wonke kaSiphile uhlangana uyobonga kumasipala. Ngibonga kakhulu kwiSolezwe ngoba ukube kululuvezanga usizi lukaPhile,” kubeka uBiyela.
UBiyela uthe okwamanje uSiphila useGoli lapho edlalela khona i-Empire Sports Academy abanikazi bayo abangawuvali umlomo ngebhola lakhe.
Kudlalwa neHighlands Park kwi-Under 17 ushaye igoli maqede wakhanda nelinye.
UBiyela uveze ukuthi imingenelo yeJuly Asilali edlalwa amaqembu awu-40 ubusuku nemini ezinsukwini ezimbili, isiqaliwe ukufakwa.