Kuhle ukunikeza izingane ezincane ithuba
KUNENTO engisanda kuyiqaphela ezinhlelweni zasekuseni emisakazweni emithathu engiyibona ifana.
Ngiqale ukuzwa kwiMetro FM ohlelweni lwasekuseni phakathi nesonto lapho benesigaba okukhuluma kuso odado. Kwakuyingesikhathi kusekhona uDJ Fresh lapho babenesigaba esithi #Are You Smarter Than APrimarySchoolKid. Lapho kwakushaya khona izingane ezincane zibuze isihambeli imibuzo.
NangeSonto ohlelweni lukaThami Ngubeni noKhaya Mthethwa kunesigaba okukhuluma kuso izingane. NakwiGagasi FM futhi ohlelweni lwasekuseni lukaFelix Hlophe kunesigaba lapho bekhuluma khona nezingane.
NakwiSidlo Sasekuseni kuKhozi FM sikhona isigaba esifanayo. Lokhu kungitshela ukuthi izingane zibalulekile ikakhulukazi ngoba ziyikusasa lezwe.
Imisakazo eminingi iyazikhohlwa igxile kuphela ekusakazeleni abantu abadala bodwa. Kuhle ukusakazela abantu abadala kodwa nezingane kumele zibhekelelwe ukuze zikhule ziwuthanda futhi ziwulalela umsakazo.
Ngagcina iZululand FM nayo inalo uhlelo lwezingane.
Ukuzwakala kwezingane emisakazweni ehlukene kusho ukuthi uKhozi FM lwayeka igolide ngohlelo Ukhozi Lodado. Lapha izingane ezincane zazisina zidedelana ngokukhuluma emoyeni futhi kube khona ezazikufunda.
Njengoba uSiwe Cele esemdala nje, ozolandela emuva kwakhe uzotholakala kanjani uma izingane zingenayo inkundla yokuzibonakalisa? Phela ngeke enze iTeen Zone kuze kube yiyo leyo nkathi ekubeni engaseyona naleyo teen. Sekumele akhule akhushulelwe kolunye uhlelo.
Kubalulekile ukufundisa izingane zisencane ngomsakazo ukuze zikhule ziwazi. Esikhathini samanje umsakazo uncintisana nezinto eziningi. Asisathembele kuwo ukuthola isikhathi, ukujabula noma ukuzwa izindaba kodwa sikuthola ezindaweni eziningi. Umsakazo-ke kumele usheshe uzakhele abalaleli bangomuso ngokubamba abasakhula ukuze bangagcini sebezijabulisa ngokunye okuseceleni.
Maningi amathuba okuthi bakhule belalela umsakazo we-internet kunokulalela ngendlela ejwayelekile. Ngakho kuhle ukunikeza izingane ithuba. Angiqondi ukuthi kungani imisakazo ibingakwenzi lokhu ngesikhathi esiphambili njengoba sebekopelana bonke manje. Mhlawumbe Ukhozi ngesikhathi soKhozi Lodado noState Your Mind babona ngathi kuphelelwe yisikhathi kanti cha.
Ku-947 uFresh unesigaba lapho ekhipha khona isihloko bese ecela izingane ukuthi zithumele ama-voice notes ngokuthi zingayilungisa kanjani leyo nkinga. Kumnandi lokhu ngoba sizwa izingane nemiqondo yazo hhayi ukuthi zilokhu zifundiswa izinto okuyinto eziyiyela esikoleni.
Ungangibhalela ku-fanelesibonge.bengu@inl.co.za, kuTwitter @fanelebengu