I-WHO ikhuza umkhuba wokuphehla abesifazane
UKUSOKWA kwabesifazane noma ukusikwa kwengxenye ethile yesitho sowesifazane kungenzelwa ukwelapha kuholela ekutheni abesifazane babe nezinkinga zesibeletho.
Lo mkhuba, owaziwa ngeFemale Genital Mutilation (FGM) usuneminyaka engaphezulu kuka-30 wenziwa emazweni ehlukene emhlabeni.
Inhlangano yezempilo emhlabeni, iWorld Health Organisation (WHO) ithi abukho ubuhle bezempilo obenziwa yilo mkhuba ohlanganisa ukusikwa, ukudonswa kwezinyama ezithile noma ukukhishwa kwegazi okwaziwa ngokuphehla entombazaneni kunalokho kuba nobungozi.
I-WHO ithe lokhu kuholela ekutheni abesifazane babe nezinkinga zokopha kakhulu, ngokuhamba kwesikhathi owesifazane ekhula abe nesigaxa, izinkinga zokubeletha ezigcina ziholele ekutheni kushone ingane.
Le nhlangano ithe abalelwa ku-200 million amantombazane asenziwa lo mkhuba emazweni angu-30 emhlabeni, kuwo okukhona ne-Afrika, iMiddle East ne-Asia.
Njengoba muva nje bekuyiInternational Day of Zero Tolerance for Female Genital Mutilation, iWHO, United
Nations International Children’s Emergency Fund (Unicef), ne-United Nations Fund For Population Activities (UNFPA), lezi zinhlangano zisebenzise lolu suku ukukhuza nokukhuthaza amazwe ukuthi enze isiqiniseko sokuthi avikela amantombazane aneminyaka engu-15 kuya phansi okuyiwo ajwayele ukwenziwa lo mkhuba. I-WHO ithe emazweni lapho lo mkhuba wenziwa khona ukwesekwa kwesiphakamiso sokuthi uqedwe kuya ngokuya uqina. Le nhlangano ithe ukukhula kwamazwe anezinhlelo zokuthi lo mkhuba uqedwe kungasiza ekutheni ngo2030 kube sekuvikeleke amantombazane amaningi abengaba sengozini yokwenziwa lo mkhuba.
Isitatimende esibhalwe ngokuhlanganyela ngoDkt Natalia Kanem we-UNFPA, Nkk Harrietta Fore we-UNICEF, Nkk Phumzile Mlambo-Ngcuka we-United Nations Women noDkt Tedros Adhanom Ghebreyesus weWHO, sithi abantu abasha bangalesi sikhathi bangabamba iqhaza elibonakalayo ekuqedeni lo mkhuba.
“Ukubamba kwabo iqhaza kusho ukuthi abantu abasha bahlangane benze izinhlangano zabo ezilwela amalungelo obulili eziphinde zilwe nodlame olubhekiswe kwabesifazane nezingane. Imikhuba eyingozi kumele iqedwe. Kumele kufundiswe intsha ukuthi ikwazi ukubona ukuthi lo mkhuba ungenye yezindlela zokuhlukumeza abesifazane. Kumele iphinde ifundiswe nangezinto ezingelona iqiniso kodwa emiphakathini yethu ezithathwa njengeqiniso. Lokhu akuyona into abantu abasha abangayenza bodwa kudingeka abaholi nosopolitiki abazophumela obala bakhuze,” kusho isitatimende.
Siqhube sathi ngonyaka odlule ingqungquthela ebiseNairobi, eKenya, ebihlanganise ohulumeni abehlukene, izinhlangano zomphakathi, izinkampani ezizimele, abezenkolo kube nokuzibophezela ekutheni imikhuba eyingozi efana nalo kufanele iyekwe.