Kuneminjunju yezicubu engabekezeleki kumuntu
UMA ungakaze uhlukunyezwe yizicubu eziqaqamba ngendlela engabekezeleleki, ubathe uyazazi buthi ngilapha ubuhlungu; ngiyakubongela futhi mbonge Ongaphezukonke njalo nje. Ngikhuluma ngobuhlungu osuke ubuzwa ukuthi abukho ethanjeni, busesicutshini nje kuphela, siyagwaza, siyashisa, imibani yezinhlungu iza ilakanyana.
Kulezi zinsuku sande kakhulu isibalo sabantu bakithi abaphethwe yilolu hlobo lwezinhlungu, abanye sebeze bayehluleka nokuzihambela ngezinyawo zabo, kunzima kakhulu nokusebenza.
Izicubu ziyingxenye yomzimba, yizona ezimbathise amathambo. Indlela isicubu esizwela ngayo izinhlungu kuya ngokuthi yiluphi uhlobo lwesicubu, uyini umsebenzi wesicubu leso, yimiphi imizwa elawula lesi sicubu nokuthi omakhelwane balesi sicubu bangobani. Okubalulekile nakakhulu wukuthi imbangela yalobu buhlungu iyini. Ngamanye amazwi uyini umsuka?
Ake sithathe nje ubuhlungu obujwayela ukubelesela ehlombe, kungaba ngelosokudla noma yisinxele. Lobu buhlungu bugwaza lapho kuhlangana khona ihlombe nengalo sengathi yintshumentshu, izinhlungu zehle nengalo ziye endololwaneni kube ngathi kunembobo eyakhele khona, zigijime njalo ziyovithiza isandla esihlakaleni nangemuva kwaso.
Kokunye lezi zinhlungu zivele zikhethe indawana lapha esihlakaleni ezansi nesithumpha, kokunye ubuhlungu bube ngathi bubhoboza ingxenye yengalo engenhla, phakathi nayo lapha ngasehlombe.
Ubuhlungu lobu buyakwazi ukugijima nehlombe buye entanyeni, emuva kwendlebe kuze kunkenkethe phakathi kuyo indlebe, usuyozwa ngathi kunomsinjwana endlebeni.
Le micibisholo iyakwazi ukugudla izinhlafuno ize iyofika ekhanda, alikuphathi linani ikhanda?
Ngiyaphinda ngiyagcizelela ukuthi okubalulekile lapha wukufuna isiphetho salokhu kugula kwelashwe umsuka, hhayi ukuthithibalisa izimpawu nje kuphela.
Sisehlombe nje mangikhohlwa ngubuhlungu obugudla isiphanga emachosheni aso, lobu-ke bona buyathanda ukujikeleza ngezimbambo buze ngaphambili ungathi yibhande, kwabesifazane buze buyogwaza ngaphansi kwamabele.
Njengoba sibona lapha, kuyacaca bha ukuthi buningi ubuhlungu obuzitikayo lapha kithi esiyaye sibuhlanganise konke, sithi yizibhobo, singabe sisayifuna imbangela yazo.
Angingabushiyi ngaphandle ubuhlungu obokubamba ngemuva esehlulampisi, behle njalo ngomgogodla kube ngathi kuyashisa, kuthi thelwa ngamanzi, kwabanye baye bafise ukushaywa ngezibhakela ngemuva phakathi kweziphanga.
Kuba sengathi izinhlansi ezisakazekayo uma usumbambathwa ngasemuva. Angikwazi ukungayithinti iminjunju eba lapha ethanjeni eliyisiphekepheke lesinqe elikhona nhlangothi zombili.
Ubuhlungu baleli thanjana buhambisana nezihlungu ezisuka eduze komgogodla, ngapha nangapha kwawo, kube ngathi kunezimbobo ezimbiwe ngegejazembe, lapho kuba nzima ukusukuma kumele ujikajike ubambelela, ufuna indawana ezoba ngcono kunezinye. Kukhona lobu buhlungu obuzungeza ithambo lenyonga ngaphandle, buphinde buzenze samvilaphi ngaphakathi. Lapha ngaphandle buyaye bugeleze behle ngethanga buze buyofika edolweni.
Lapha emvilaphini bukubamba ungakwazi nokunyakaza, kuvele kuthi hlala phansi; abanye sebaze bahluleka nokusebenza ngenxa yalezi zinhlungu. Kunesicubu esincanyana esitholakala le ngaphansi kwezicubu ezakhele izinqe. Ubuhlungu balapha ezinqeni buyehla buzike ekupheleni kwezinqe, bese bugeleza njalo ngemuva kwezicubu zethanga buze buyofika emfasankomo. Lapha kuba ngathi idolo liyakhonkeka, kube buhlungu kuqaqambe le misipha engemuva kwedolo.
Le minjunju yehla njalo ngezicubu ize iyothi cababa ezinyaweni, ezithendeni, ngaphezu kwezinyawo, ematheni nasezinzwaneni.
Uma sekunje usuke usuhamba ubabayela, amandla engasekho emzimbeni.
Ngithe-ke le minjunju yehla isuka emfasankomo ize iyofika ezinyaweni; empeleni lo muzwa omkhulu ogijima ngemuva kwethanga uthi uma ufika emfasankomo bese uhlukana kabili, ucezu lugijima ngaphandle kwesitho olunye lwehla ngaphakathi nesitho kuze kuyofikwa ezinyaweni.
Yile mizwa-ke ethi ingahuzuka idale ubuhlungu obukhulu, obushisayo, bube nenkwantshu, buhambahambe amabala lapha ezicutshini zesitho. Lobu buhlungu abubekezeleleki, kwabanye bushiya izishizi ezimnyama esithweni nezilonda eziphuzayo ukuphela. Kwesinye isikhathi uyaye uthole sekunezigaxa eziyimibadlana ngaphansi kwesikhumba, umuntu avele amangale ukuthi lezi zigaxana emzimbeni zivelaphi, kanti kwabanye uvele ubone sekunezibazi emzimbeni, kube ngathi kukhona okukushayile; kanti cha yilokhu kugula okuhamba kuhluma hluma yonke indawo, kudala ibhizi yakho.
Kule nkathi izinkinga zisuke sezimbondelene ndawonye, induku isizinciphele yaba ncanyana, isikushiya endleleni ivele iwe, okanye ayisathi nda, isihlala ikhophozele ibheke phansi.
Angisayiphathi uma isivele isheshe ikhafule ngokushesha, lapho usathi nguwe nguwe, nali itafula lidekiwe, yikha udle!
Zonke lezi zinkinga zokugula ziyelapheka, hamba uye kudokotela wakho uzosizakala!
Mpilonde!!