Kusuke isidumo befuna amanzi
KUNGENELE imeya nobuholi bayo izolo ukuqeda umbhikisho womphakathi, omise yonke into kuN2 eHarding.
IMeya kaMasipala Ugu uMnuz Sizwe Ngcobo nePhini layo uNkk Phumlile Mthiyane, kudingeke baziyele mathupha emphakathini ukuyozwa izikhalo zawo. Umphakathi waseBhobhoyi, eMurchison, nakwezinye izindawo, uvukele emgwaqweni ubhikishela amanzi osekuphele amasonto engekho. Isolezwe lithole ukuthi kwezinye izindawo sekuphele amasonto amathathu amanzi engabonwa. Selokhu kwaqala inkinga yamanzi umphakathi uveza izikhalo zawo ekhasini likaFacebook, abaningi abakhala ngokuhluleka kobuholi kulo masipala.
Okhulumela umasipala uMnuz France Nzama, uthe imeya nobuholi bayo iyamukelile incwadi yezikhalo, athe ibiphambili indaba yokuphela kwamanzi eBhobhoyi.
Uthe imeya ikuvezile ukuthi inkinga edala ukuphela kwamanzi, wukucekelwa phansi kwengqalasizinda.
“Imeya izibophezele ukuthi umphakathi waseBhobhoyi uzobekwa phambili ukuze kuxazululeke inkinga yamanzi. Kutshalwe nonjiniyela abazobheka ezinye izindlela zokulwa nale nkinga,” kusho uNzama.
Kuqubuka lo mbhikisho nje isimo simanzonzo kulo masipala emuva kokuxoshwa kwabasebenzi abangaphezu kuka-100. Ukucekelwa phansi kwengqalasizinda kumataniswa nokuxoshwa kwalaba basebenzi. NgoLwesine kuhlelwa imashi yosuku lonke ezobheka emahhovisi kamasipala.
UMnuz Mkululi White ongumgqugquzeli wale mashi, uthe konke sekumi ngomumo futhi bayitholile imvume yokumasha. Uziqhelelanisile nombhikisho wayizolo, athe wenziwa wukuthi umphakathi usukhathele wukulinda.
“Abantu abasakwazi ukubekezela ngoba amanzi abanawo. Sibacelile ukuthi balinde imashi yangoLwesine kwasho ukuthi sebedinwe kakhulu. Asinanxa namuntu kodwa sibona sengathi ubuholi bukamasipala buyehluleka,” echaza.
Uthe abahambisani nokuxoshwa kwabasebenzi futhi babona sengathi ubuholi abukwazanga ukusingatha kahle udaba lwabo.
NgoLwesine olwedlule kushiswe imoto kamasipala okuthiwa ibipakwe emzini womunye wonjiniyela kwaNositha. Sezizine izimoto ezishisiwe kulo masipala nonyaka, okubalwa neloli yamanzi eshiswe kubhikishwa muva nje. UNzama uthe sebewabikele amaphoyisa ngalezi zigameko zobugebengu, wanxusa nomphakathi ukuthi ubike abasolwayo.
Okhulumela amaphoyisa KwaZulu-Natal uColonel Thembeka Mbele, uthe kuvalwe imizila emithathu ngamathayi avuthayo nezinsimbi. Uthe izimoto kudingeke zisebenzise umgwaqo wasePort Edward, kwatshalwa namaphoysia ukuqapha isimo.