Kubhuntshe ingqungquthela yeCosas kusuka izibhelu
AKUKACACI ukuthi izohlala nini ingqungquthela kazwelonke yenhlangano yabafundi, emuva kokubhuntsha kwebingempelasonto okulimale kuyo abayisikhombisa.
Lishone elayizolo kusabhungwa emhlanganweni eGoli mayelana nengqungquthela yeCongress of South African Students (Cosas), okufanele kukhethwe kuyo nobuholi obusha.
Iphele sekumuncu ngoMgqibelo le ngqungquthela ebiseMagaliesburg Resort eGoli, kubangwa indaba yokhetho.
Iphele singakashayi isikhathi njengoba bekumele iphothulwe ngeSonto. Le ngqungquthela iqale ngoLwesihlanu lapho bekuhlangene izithunywa zezifundazwe ezahlukene njengoba bekuzokhethwa ubuholi obusha. Isolezwe linayo i-video ekhombisa abebethamele le ngqungquthela beshayana ngezihlalo, ebezindiza phezulu.
Abanye babonakala bebaleka begcwala izinkalo njengoba bese kushaywa kwasani.
UMichael Mayalo onguNobhala weCosas eWestern Cape, uthe bavumelane ngokuthi imiswe ingqungquthela ngoba bebona kungasaphephile. Uveze ukuthi abaningi abalimele ngabaKwaZuluNatal (KZN), omunye wangakubo eWestern Cape olimale kakhulu ungeniswe esibhedlela. UMayalo uthe umsindo ususwe wukuthi akulandelwanga imigomo yokhetho, kukhona abaphakanyiswe okhethweni abangafanele.
UMayalo utshele Isolezwe ukuthi sebezithumele ezinhlakeni ezifanele izikhalo ngokusemthethweni ngale ngqungquthela futhi basazimisele ukuthi kubizwe enye okuzokhethwa kahle kuyo. Akukacaci ukuthi izoba nini le ngqungquthela kodwa izolo bekunomhlangano.
Omunye wezithunywa zaseGauteng ongathandanga ukudalulwa, ukuqinisekisile ukuthi ingqungquthela iphazanyiswe yizinxushunxushu. Uthe abakazi ngezinhlelo zokukhethwa kabusha ngoba balinde isinqumo ebuholini obuphezulu.
USihlalo weCosas eKZN uZithulele Ndlela, uthe zikhona izithunywa ezilimele kodwa akubanga kubi.
Uveze ukuthi kule ngqungquthela bekukhona izithunywa ze-ANC okubalwa uMnuz Malusi Gigaba, wakuqinisekisa ukuthi umhlangano wayizolo yiwona ozocacisa.