UMosimane ukhwele wadilika kubaphathi bePSL neDowns
UMQEQESHI weMamelodi Sundowns, uPitso “Jingles” Mosimane uwine kunzima kwiNedbank Cup maqede wakhwela wadilika kubaphathi bePremier Soccer League (PSL) ngezinqumo ezithinta imithetho elawula iMultichoice Diski Challenge (MDC).
Akazange agcine lapho uMosimane kepha usebenzise ithuba elifanayo washiya angalazi kubaphathi bayo iSundowns, ngendlela utshani obebugundwe ngayo enqoba ngo 2-0 kwiVaal University of Technology, kwiLast 16 yeNedbank. Lo mdlalo ubuseLucas Moripe Stadium, e-Atteridgeville.
I-Sundowns itabalase kwaze kwalunga esiwombeni sesibili, imiswe kabi yiqembu elidlala esigabeni esingaphansi kwe-ABC Motsepe League. Ngemuva kwalo mdlalo uMosimane obebophele inqwaba ayabadlali abangasalazi jezi kwazise unabadlali abaningi abebesezigwebeni zamakhadi, ukhale kakhulu ngomthetho wokukala iminyaka kubantu okumele badlale kwiMDC.
“Ngabe siyanyaza uma singabona ugcobho kwiMDC ngoba sinabadlali abaziwa umhlaba wonke manje ngenxa yayo kodwa ngeke sithule uma sibona ukuthi kukhona lapho kushayiseka khona. I-MDC yinhle kodwa angikholwa ukuthi iwenza wonke umsebenzi uma ivimba abanye abadlali ukuthi bangadlali ngenxa yeminyaka yabo.
“Namuhla sithwale kanzima kungafanele ngoba besidlalisa abadlali abangasakwazi ukuba senkundleni ngenxa yezizathu ezahlukene. Angikwazi ukukhomba abadlali bami ngokuthi sithole umphumela ngale ndlela ngoba akukho lapho bedlala khona. Kumaligi amakhulu emhlabeni iligi efana neMDC iyona okubuya ngayo abadlali abakade belimele. Uma iMDC ibavimba laba badlali bazoyibuyisa kuphi ifomu yokudlala? Kungenxa yalezi zinqumo ungizwa ngikhala ngeMDC nje,” kusho uMosimane. I-Downs izofulathela iNingizimu Afrika ibhekise amabombo e-Egypt lapho iyodudulana khona kowomlenze wokuqala we-quarterfinal yeCAF Champions League ne-Al Ahly ngoMgqibelo ngo-6 ntambama, e-Al Salaam Stadium, eCairo.
Lo mqeqeshi uthembise ukuthi uzophenya kabanzi ngokudale ukuthi utshani busikwe sengathi kuzodlalwa umbhoxo.
“Inkinga enkulu ebesibhekene nayo wukuthi bekungadlaleki. Indlela utshani obebusikwe ngayo akuyona le ejwayelekile. Vele umsebenzi wami wukuthi ngisethe isikimu uma sengiqede ukuqeqesha abadlali kodwa ngeke izikhulu zeSundowns ziyithole imiphumela eziyifunayo enkundleni esikwe kanje. Uma befuna nginqobe kwi-Al Ahly kumele balalele mina ukuthi utshani ngifuna busikwe kanjani ngaphandle kwalokho abakhohlwe,” kusho lo mqeqeshi sakusonga.
I-Sundowns izoze ibuyele emidlalweni ye-Absa Premership ngokubhekana neStellenbosch FC e-Athlone Stadium, eKapa, ngoMashi 11. Ngemuva kwalokho inomdlalo onzima lapho izobhekana khona ne-Orlando Pirates ngoMashi 17.