Amademeshe adle uhulumeni uR100b
IMALI eningi ekhokhwa wumnyango wezempilo osuke uboshelwe amacala okungalandelwa kwemigomo nobudedengu ngesikhathi kwelashwa iziguli, inciphisa imali okumele ngabe isetshenziselwa izinhlelo zomnyango.
Ethula isabelomali uNgqongqoshe weziMali, uMnuz Tito Mboweni, uthe amacala amademeshe afakwa yiziguli afinyelela kuR100 billion. Izibalo zabantu abafayo ezikhungweni zikahulumeni zehlile zisuka ku-5.4% onyakeni wezimali u-2013 /2014 zaya ku-4.6% ngo-2018/19.
Isibalo sabesifazane nezingane abashona emuva kokubeletha sehle ngo-20.5% ngesikhathi esifanayo kodwa amacala amademeshe abhekene nomnyango ngesikhathi esifanayo senyuke kakhulu.
“Amacala amademeshe athinta ubudedengu obenzeke ngesikhathi kwelashwa iziguli ngonyaka sesenyuke saba phakathi kuka ku-23% kuya ku-30%. Ngonyaka wezimali u-2018/2019 imali ekhokhwe wumnyango yezindleko zabameli uR99.2 billion kanti imali efunwa ngababopha umnyango uR2 billion.”
Uqhube wathi ngokujwayelekile amacala kusuke kungawobudedengu obenzeka ngesikhathi kwelashwa iziguli ezikhungweni zezempilo zikahulumeni.
“Le nkinga isidale ukuthi umnyango ungakwazi ukubhekana nomsebenzi wokunakekela iziguli ngendlela. Ngakolunye uhlangothi usuphenduke insengwakazi kubameli bamacala athinta ezempilo.”
UMboweni uthe bazonikeza umnyango wezempilo uR19.9 billion eminyakeni emithathu ukuze kwakhiwe izibhedlela, ezinye zilungiswe ukuze zilungele uhlelo lomshwalense wezempilo kahulumeni, iNational Health Insurance (NHI) okulindeleke ukuthi iqale maduze. Ukhiphe uR55.6 million ukuze kwenziwe izinhlelo zokuthi kulungiselwe ukuqala kweNHI.