Bayanda abagilwa ngenxa yeFacebook
SEKUPHINDE kwathunjwa omunye wesifazane obekade ethole umsebenzi wokusiza endlini kwiFacebook emva kowesifazane waseMariannridge ngasePinetown ngoLwesibili.
Sebebane abesifazane okubikwe ngabo abathunjwe base beyadedelwa emuva kokuthi imindeni yabo isikhiphe imali yokubakhulula.
Lo wesifazane okuthiwa udabuka eQwa Qwa, eFree State uthunjwe ngoLwesibili ebusuku.
Udedelwe ngo-1 entathakusa izolo emva kokuthi umndeni wakhe ukhokhe uR2 000.
Kuthiwa uyalelwe ngowesifazane kwiFacebook esuka kubo eQwa Qwa emtshela nokuthi uma esuka edolobheni eThekwini uzofika ehle esitobhini eMariannridge Pool.
Wehle kulesi sitobhi ngo-6.13 ntambama eselindwe yijongosi elimphathise izimpahla zokugqoka abeziphethe, lahamba naye kanti limusa kubathumbi bakhe abebehamba ngemoto.
Bafike bambopha izandla nezinyawo bamfaka emotweni bashaya bachitha naye.
Sebesehlathini okuthunjwa kulona abesifazane, abathumbi bashayele izihlobo zalo wesifazane ucingo befuna imali yokumkhulula.
Umndeni wakhe kuthiwa ukhokhe imali wase eyakhululwa ngo-1 entathakusa, izolo.
Ngesonto eledlule kuthunjwe uNksz Lungisile Xulu (25) waseBhambayi, eNanda, oxhumane ngeFacebook nowesifazane ozibiza ngoVeronica Martin obefake isikhangiso somsebenzi wokusiza endlini ekhasini leFacebook iDomestic Workers.
Abathumbi babefuna uR20 000 wokumkhulula kodwa umndeni wagcina ukhokhe uR2 000. UNksz Xulu wathi wayethunjwe nabanye besifazane futhi edliswa izidakamizwa ezisheba noshephisi abathumbi bakhe ukuze akhulume. Emasontweni amathathu edlule kubikwe ngoNksz Neliswa owathunjwa, umndeni wakhe wakhipha uR4 400 owawufunwa. Nomunye wesifazane (27) elingatholakalanga igama lakhe abathumbi bafuna uR5 000 ukuze akhululwe ngoLwesihlanu lwangoFebhuwari 14. Nsukuzaphuma amaphoyisa asesiteshini saseMariannhill aya ephindelela kuleli hlathi elimnyama ethungatha abasolwa nabantu okungenzeka bathunjiwe. Abhidliza nemijondolo eyakhiwe kulona okukholelwa ukuthi kuthunjelwa kuyona abagilwa. Kutholwe izimpahla zokugqoka nezikhwama zabesifazane.
Ngeledlule amaphoyisa axwayise abantu ukuthi bahlale beqaphile abantu abathembisa abanye imisebenzi engekho ezinkundleni zokuxhumana kanti bazobathumba bafune imali yokubakhulula. Anxuse umphakathi ongaba nolwazi ngalezi zigameko ukuthi ubikele amaphoyisa.
Okhulumela amaphoyisa KwaZulu-Natal uColonel Thembeka Mbele ukuqinisekisile ukuthi kukhona owesifazane obethunjiwe.
Uthe kuvulwe icala lokuthumba esiteshini saseMariannhill.