I-USA izibophezele ngenxa kaMshengu
INXUSA lase-USA lizibophezele ukuthi bazoqhubeka nokweseka isikole samabanga aphansi eClermont, ebesixhaswa ngenxa yobudlelwano obebukhona nomholi weLadysmith Black Mambazo ongasekho.
UNkk Sherry Sykes obevakashele okokuqala Etshelihle Primary izolo, uthembise ukuthi ngeke bunqamuke ubudlelwano i-USA ebinabo nalesi sikole. Ubehambisana noMnuz Stanley Brady ongumngani omkhulu kaDkt Joseph Shabalala, okunguye owamazisa kulesi sikole. UBrady onenhlangano esiza imiphakathi ebizwa ngeThe SB Step Ahead Program, uthe uShabalala wamletha kulesi sikole eminyakeni engu-25 edlule. Lesi sikole siseduze nomuzi omdala kaShabalala, uBrady asenikele kaningi kusona nenhlangano yakhe.
UNkk Sykes uthe uyajabulela ukunyathela lapho kuphile khona leli qhawe elingasekho lomculo wesicathamiya. Uthe kuningi abazimisele ukusiza ngakho kuleli ngenxa yokuthi uShabalala wabavulela inhliziyo yakhe.
UBrady uveze ukuthi uzoqinisekisa ukuthi impilo kaShabalala iyabonakala ngemisebenzi yakhe noma engasekho.
‘’Ngathi ngiqala ukuvakasha emzini kaShabalala, wangiletha kulesi sikole. Sekufana nokuthi yisekhaya ngoba bekuthi njalo uma ngimvakashele, ngizobheka nasesikoleni. Ngiyazi ukuthi kunezingane ezidinga ukudla nezinye ezidinga imali yesikole. Kumele senze ukuthi ungashabalali umoya wothando kaShabalala,’’ kusho yena.
UBrady uthe ufisa nabanye osomabhizinisi base-USA bafike ukuzonikela ezikoleni nasemiphakathini yakuleli, ukukhombisa uthando abenalo uShabalala. Uthembise ukuthi maduze bazothatha uthishanhloko walesi sikole uNkk Londekile Biyela, ayoncela ulwazi ngezemfundo e-USA. Uthe bafuna abone indlela izinto ezenziwa ngayo kuleliya lizwe, abuye azotshala esikoleni sakhe.
UNkk Biyela uthe uBrady usefana nelungu laseTshelihle. Uthe ubevele evakasha kulesi sikole, ngisho yena engakabi wuthishanhloko.
“Uyanikela esikoleni, nangesikhathi kusakhokhwa ubelekelela abafundi abangakwazi ukuzikhokhela. Kunabafundi abebefunda kulesi sikole abathathile wabafaka emakolishi ase-USA,” echaza.
Phakathi kwalaba bafundi abasizwe wuBrady kukhona noMnuz Zakhele Xaba, naye obekhona izolo. Bekukhona nendodana kamufi uMnuz Nkosinathi Shabalala, ozoqhubeka nokusebenzisana noBrady nenxusa lase-USA ukweseka lesi sikole.