Ulunga kuphela uma efuna inkonzo yasekamelweni

EZOTHANDO

UMBUZO: Unkosikazi wami wafika nengane emshadweni wethu kanti nami ngishade sengineyami. Inkinga akafuni ngiyenzele lutho eyami ingane, uvele adinwe aze akhiphe amagama abuhlungu okuthi ngizonda eyakhe. Sengize ngathi kuye kungcono ukuthi le eyakhe ike iyohlala kubo ngoba abazali bakhe basaphila kanti mina angisenabazali nokwenza eyami ihlale nathi. Bengifisa ingane yami ibe nekusasa elihle ifunde manje angazi ngenzenjani ngenxa yesimo engiphila kuso. Zolo lokhu, umngani wami ucele ukubona ingane yami okuthe uma isibuya kwasuka omkhulu umsindo wokuthi ngiyishiyeleni eyakhe. Ngenzenjani? Igama ligodliwe, eVerulam

Impendulo: Uma ushada umuntu umshada nako konke okwakhe. Awukwazi ukuthanda unkosikazi wakho kodwa ungayithandi ingane afike nayo emshadweni. Nonkosikazi wakho ngokunjalo kumele akuthande nomthwalo ofike nawo.

Ingakho sihleze sithi umshado ufuna abantu ababili esebekhulile ngokomqondo. Akumelanga engabe nibanga ukuthi umntwana okabani kodwa kumele engabe nikhulisa abantwana benu bobabili. Le nto iqala ngezinto ezincane njengokuthi ayikho ingane kabani nekabani kodwa izingane zethu.

Isukumeleni le nto nonkosikazi wakho ningavumi indaba yabantwana ingene phakathi komndeni wenu. Tholani indlela yokukhulisa abantwana benu ndawonye, ukubahlukanisa kuzodala uqhekeko ebantwaneni nakunina.

Umbuzo: Ngingowesifazane oshade nendoda enezingane ezintathu. Sengihlale nayo isikhathi eside sengiyazi njengoba ngizazi. Umuntu wami akazwani nokutshelwa iqiniso. Uma ngimtshela ngezinto azenzayo engingazithandi kuvele kuxatshanwe into emnyama. Akanqeni nokungilwisa phambi kwezingane.

Kodwa into engixakayo ukuthi mhla efuna inkonzo yasekamelweni uzenza umuntu olungile emva kokuthola into ayifunayo abuyele kulo muntu engingamthandi, ngize ngithi mhlampe yingoba wazalwa esithenjini ngakho uzicabangela yena yedwa.

Sengikhathele ukukhuluma into eyodwa naye.

Okhathazekile eMphithi

Impendulo: Okubuhlungu ukuthi umshado awumshintshi umuntu. Uma ngabe ushade unenhliziyo embi umshado uzoyiveza obala inhliziyo yakho. Umyeni wakho udinga ukuzilungisa yena kuqala ngoba inkinga inaye uqobo. Njengokusho kwakho kungenzeka ukuthi indlela akhule ngayo yiyo le emenza umuntu ohlale efuna ukuzivikela ngasosonke isikhathi.

Akumelanga ukhathale ukulungisa izinto phakathi kwakho nomuntu omthandayo. Qhubeka nokumazisa umyeni wakho izinto ofuna azilungise ngaye. Ngeke kubelula ngakho kuzomele ube nesineke naye.

Umbuzo: Ngingumama osemcane nongene emshadweni senginengane yentombazane ena-15. Inkinga ingane yami ingitshele ukuthi umyeni wami unokuyibuka nokukhuluma ngendlela engayiqondi kahle. Uze asabe nokusala nomyeni wami yedwa endlini. Ngiyafuna ukuyikholwa ingane yami kodwa futhi ngiyamuthemba nomyeni wami. Ngiyazi akayena umuntu ongahlukumeza umntwana wami. Ungumuntu onothando nengimthembayo futhi.

Angazi noma ngikholwe ingane yami noma ngithembe umyeni wami. Ngenzenjani?

Igama ligodliwe

Impendulo: Into yokuhlukunyezwa kwabantwana akuyona into ekumele uyithathe kancane. Yisukumele le nto eshiwo wumntwana wakho ngokuthi uke uyibhekisise kahle. Zinike isikhathi sokuthi ubabhekisise kahle. Bheka indlela abenza ngayo uma bendawonye. Ngeke ungaboni mekukhona into eshaya amanzi. Kungumsebenzi wakho ukuvikela umntwana wakho ngisho kungathiwa umthemba kanjani umyeni wakho. Abantwana abaningi bahlukunyezwa abantu esibathembayo nesibathandayo futhi. Umntwana wakho uza kuqala kukho konke.

Sithumele imibuzo ku info@moandphindi.com Nisilandele ku For Better or Worse with Mo & Phindi ku Facebook naku Instagram