Batshengise ubuntu abamatekisi besiza ezikoleni
INJABULO kubafundi basezikoleni ezimbili zaseLamontville, eThekwini, ezinikelelwe usoseshini wamatekisi wendawo ngezicathulo njengengxenye yemikhankaso yabo.
I-Lamontville Taxi Association inikelele ngezicathulo ebafundini abaswele ezikoleni iBantuvukani Primary neGijima Primary, ngoMsombuluko.
Usihlalo kulo soseshini, uMnuz Lwazi Banda, uthe baye kulezi zikole ngemuva kokuthi bekhulume nothishimkhulu bazo ukuthi babahlinzeke ngohlu lwezingane ezingenazo izicathulo ukuze bengusoseshini bazithengele ngenhloso yokwelula isandla nokulekelela emphakathini abasebenzela kuwo.
“Lesi kuseyisiqalo kodwa inhloso yethu ukuthi ngonyaka ozayo sihambele zonke izikole ezikule ndawo. Ngaphandle kokunikela ngezicathulo, kwesinye isikole iGijima Primary sithole ukuthi sona asikho esimeni ngokwesakhiwo saso. Sathembisa ukuthi sizobuya sizosilungisa sizame nokusitholela abaxhasi abazosilungisa lapha nalapha,” kusho uBanda
Uthishomkhulu waseGijima Primary, uNkk Nonhlanhla Nkosi, ubonge wanconcoza okwenziwe ngabemboni yamatekisi kule ndawo. “Sibonga kakhulu ngokuthi banikele emphakathini. Lokhu kuyakhombisa ukuthi umphakathi abasebenza ngawo bayawazisa. Bathembisile ukuthi bazophinde babuye basilekelele ekulungiseni isikole,” kusho uNkk Nkosi.
UMnuz Mbuso Sosibo onguthiksholmkhulu waseBantuvukani Primary yena uthe, “Abantu bamatekisi badume ngokuthi bayalwa kodwa lokhu kuyakhombisa ukuthi ababona abantu ababi kodwa abantu abanakekelelayo futhi abafisayo ukubona izingane zifunda. Lokhu kusho lukhulu kithina njengesikole lokhu abakwenzile kuhle kakhulu.”
Naye uveze ukuthi osomatekisi yibona abeze esikoleni sabo babacela ukuthi belethele izingane izicathulo.