Ushaqelwe impahla ngesikweletu sesikole
UKHALA ezimathonsi umzali waseVryheid onguthisha, okudliwe impahla yakhe ngenxa yokukweleta imali yesikole sengane.
Lo thisha igama eligodliwe ukuvikela ingane, usevule icala njengoba ethi izikhonzi zenkantolo zifike ngoLwesine olwedlule engekho zagqekeza isango. Uthe zishaqe amafriji amabili, isitofu esikhulu, ubhazabhaza wethelevishini ne-microwave.
Utshele Isolezwe ukuthi indodakazi yakhe eyenza uGrade 10 eVryheid High, ikweleta uR9 000 wesikole. Lesi sikweletu sisukela kwesika-2018, athe sasiwuR4 700.
“Isikole sibiza uR13 000 ngonyaka kodwa imali ayikhokhwa yonke kanyekanye. Ngenxa yokuthi ngigulelwa umyeni ongasasebenzi, ngibe nenkinga yokukhokha ngendlela efanele. Isikole sangidlulisela kubameli, ngayiswa enkantolo. Ngazibophezela ukwenza uhlelo lokukhokha kancane isikweletu ngokheshi,” echaza.
Yize ingane yakhe ibikweleta, uthe ibingakaze ixoshwe esikoleni noma ibanjelwe imiphumela ekupheleni konyaka. Uvumile ukuthi ubuye wangakwazi ukukhokha ngokwesivumelwano nabameli, weqiwa yizinyanga ngenxa yokuxakwa ezinye izikweletu.
“Ngonyaka odlule kuqala unyaka, ngafaka isicelo sesaphulelo emalini yesikole kodwa ngisazoqhubeka nohlelo lokukhokha isikweletu. NgoFebhuwari 5, ngithole incwadi ivela kubameli bengixwayisa ngokuthi bazongidlela impahla,” kusho yena.
Mayelana nesigameko sangoLwesine, lo thisha uthe izikhonzi zenkantolo zafika engekho, zashaqa impahla. Ukhala ngokuthi yize azi ukuthi uyakweleta, imhlukumezile indlela okusingathwe ngayo lolu daba. Uthe ubesevele elwenziwe nohlelo lwalo nyaka lokuthi kubanjwe emholweni wakhe uR500 ukuqedela isikweletu. Ukhala ngokuthi lesi simo sesihlukumeze nengane yakhe ngokomqondo, samhlekisa nangomakhelwane. Udalule ukuthi izimpahla ezishaqiwe ezinye ngezikanina. Emuva kokudlelwa impahla waya enkantolo, bathi akaziyele kubameli abathintekayo.
“Kwale noma ngibachazela ukuthi impahla abayishaqile akuyona eyami, bangangisiza ngalutho. Umama ubeseyenzile incwadi efungelwe, wakhala phambi kwabo abameli efuna izimpahla zakhe. Angikaze ngixhumane nesikole ngoba vele udaba bese lukubameli,” kuchaza umzali.
Okhulumela uMnyango wezeMfundo KwaZulu-Natal, uMnuz Kwazi Mthethwa, uthe yize bezwelana nokuhlukumezeka komzali nomfundi kodwa izikole zinemithetho yazo. Uthe abazali bayayazi imithetho yezikole kodwa uma kunenkinga yokukhokha kumele babikele abaphathi nesigungu sabazali. Uthe kumele babheke ukuthi bekuvunyelwane ngani kulolu daba.
UColonel Thembeka Mbele okhulumela amaphoyisa KwaZulu-Natal, uthe kuvulwe icala lokugqekeza nokushaqwa kwempahla.
Umnikazi wenkampani yabammeli iGJ Vonkeman Attorneys eqanjwe ngaye, uthe isikhonzi salandela yonke imithetho bethunywe yisikole. Uthe akazi ukuthi kuvulwe icala futhi akaliqondi.