OweSafa unethemba ngozodlalisa kowabakhaya
INHLOKO yonompempe enhlanganweni eyengamele ibhola iSouth African Football Association (Safa), uTenda Masikhwa, ubeke amathemba ethimbeni eliqoka onompempe ngozodlalisa umdlalo wabakhaya baseSoweto i-Orlando Pirates neKaizer Chiefs ngoMgqibelo.
I-Pirates izokwamukela iChiefs eFNB Stadium ngo3.30 ntambama emdlalweni we-Absa Premiership ongase uguqule okuningi ngombango wesicoco. Nakuba kubhekwe okuzokwenziwa ngamaqembu womabili enkundleni kodwa ayisali ngaphandle ekanompempe ozodlalisa okungabuzwa ukuthi uzobe enenkulu ingcindezi.
Okuzokwenza kubhekwe unompempe yizidubedube ezisuke zigcina ukubhekana lezi zinkunzi ngasekupheleni konyaka odlule, lapho uThando Ndzandzeka ekhiphe ngekhadi elibomvu u-Erick Mathoho, wabeka nephenathi eshiye abalandeli beZimnyama bekhala. I-Chiefs igcine iwine ngo 3-2.
“Angifuni ukukhuluma ngokungase kwenzeke ngosuku lomdlalo. Ngifisa ukukhuluma uma sekudlaliwe, sesibheka ukuthi kwenzekeni. Ngiyalithemba ithimba eliqoka onompempe ukuthi lizoqoka unompempe ozokwenza umsebenzi oncomekayo ngosuku lomdlalo,” kusho uMasikhwa.
Kusukela kuqale isizini kunonompempe abaningi abasebancane, abafikayo esigabeni esikhulu. Iningi labo ligxekwe kakhulu ngokungenwa ngamanzi emadolweni uma kufanele lithathe izinqumo ezinzima.
Okugqame kakhulu wukungabonakali ezinkundleni kukaDaniel Bennett ongomunye wonompempe abanamava futhi oseke wayibamba imidlalo yabakhaya. UBennett umemezele nyakenye ukuthi useyayeka ukudlalisa imidlalo yamazwe wathi usezogxila kweyasekhaya.
Kodwa selokhu kuqale isizini ka-2019/2020 akakaze abonakale enkundleni. Konompempe abanamava abangaqokelwa umdlalo wangoMgqibelo kukhona uVictor Hlungwani, Victor Gomes noNdzandzeka.
“Isipiliyoni ngeke usithenge. Ngeke nokho ngithande ukugqamisa ukuthi silahlekelwe yisipiliyoni kuBennett njengoba engekho ohlwini lonompempe abadlalisayo kule sizini. Usalinde ukubizelwa esivivinyweni nabanye abangayanga ngaphambi kokuqala kwesizini,” kusho uMasikhwa.
“Onompempe abasebancane nabo basathola sona isipiliyoni. Kuwona wonke umsebenzi, indlela osebenza ngayo usafika ayifani nowenza ngayo uma usunamava. Indlela odlalisa ngayo emdlalweni wokuqala noka-10 ayifani. Kuya ngokuba ngcono uma uqhubeka udlalisa. Onompempe esinabo bazovuthwa,” kusho uMasikhwa.