Ukuthakasele ukuqokwa emicimbini yezindondo
UMLINGISI womdlalo Uzalo, uWiseman Mncube, useveze ukuthi ukuqokwa emikhakheni ehlukene emicimbini yezindondo kuleli, kuye kusho lukhulu.
Le nsizwa ezakhele igama ilingisa indawo kaJama emdlalweni othi Ehostela, iqokwe kumaSouth African Film and Television Awards nakwiDStv Viewers Choice Awards.
Yomibili le micimbi izobanjelwa eGoli ngenyanga ezayo. KumaSafta uWiseman uqokwe emkhakheni weBest Actor TV Drama.
KoweDStv Viewers Choice Awards uqokwe emkhakheni weRising Star.
Uthe umsebenzi wakhe kuyacaca uwenza kahle njengoba ukuqokwa kuyinto engenzeki kunoma yimuphi umlingisi njengoba kubhekwa izinto eziningi.
“Noma imuphi umlingisi, umculi, noma umdlali webhola angakutshela ukuthi ukuqokwa emicimbini efana nalena kusho into enkulu. Nami ke lokhu okungivelele ngiqokwa kule micimbi kukhombisa khona ukuthi umsebenzi wami ngiwenza kahle futhi abantu bajabule. Akugcini lapho, kuyasho ukuthi nezinkakha ezijaja kuyona le micimbi ikhono lami libonakala ngenye indlela kuzona,” kusho uWiseman.
Uthe le micimbi yomibili ihluke kakhulu njengoba amaSafta egxile emkhakheni wokulingisa kuthi amaViewers Choice Awards wona agxile emikhakheni eyahlukene endimeni yobumnandi.
“Okungijabulisa ngamaViewers Choice Awards ukuthi abantu abazozikhulumela ukuthi ubani obajabulisa ngomsebenzi wakhe. Ngiyabonga kubalandeli bami njengoba nothando lulukhulu, ukuhlangana nezingane zincome indlela engilingisa ngayo kumina kuyangijabulisa,” kuchaza uWiseman.