Imizamo yokuthula kufa umfundi egwazwa wumngani
IKHANSELA nesigungu esilawula isikole, bafisa imindeni yabafundi abagwazene kwashona oyedwa, ixoxe ukuze kugwemeke ukuqubuka kwengxabano. Basho kanje ngemva kokuthi umfundi egwaze omunye ongumngani wakhe washona KwaDukuza ngoLwesithathu ntambama.
UBhekumuzi Nxumalo (20) obefunda uGrade 10 esikoleni eNonhlevu Secondary eGroutville, kuthiwa ugwazwe wumngani wakhe ofunda esikoleni esingumakhelwane iGroutville High besendleleni ebheke emakhaya, washona.
Ikhansela, uNksz Phume Dube eligunyazwe wumndeni kamufi ukuthi liwukhulumele kwabezindaba, lithe laba bafundi bebengamathe nolimi futhi imizi yakubo yakhelene.
“Bekungengxabano etheni ngoba kuthiwa bebezidlalelela ngokuqhoshelana kwabafana okujwayelekile. Omunye umfundi kuthiwa uphonsele umsolwa ummese, wabe esemgwaza,” kusho uNksz Dube.
Uthe ngemva kwalesi sehlo umfundi ogwazile uzame ukuvala ukopha ngendwangu, waqukula umufi ezama ukumgibelisa itekisi kodwa kwacaca ukuthi ubopha kakhulu futhi esebonisa izimpawu zokuhluleka, okuphoqe umshayeli wetekisi ukuthi abize i-ambulensi kodwa yafika eseshonile.
“Kuyakhombisa ukuthi akukho okubi obekusophwe yilo mfundi. Uhlalile walinda amaphoyisa amthatha, eme eduze kwesidumbu somngani wakhe. Kuke kwaba khona ukuphakama kwemimoya emindenini kodwa singabaholi bomphakathi sangenela, sanxusa imindeni ukuthi yehlise imimoya kwazise kwakhelwene,” kuqhuba uNksz Dube.
Uveze ukuthi unina kamufi, uNksz Thandekile Nxumalo nomndeni wonke bakhathazekile ngokubehlele, bahluleka nokukhuluma ngalolu daba. Uthe banxusa namalungu omphakathi ukuthi udaba aluyekele emindenini nasemaphoyiseni ngemva kokuzwakala kwamahlebezi athi kukhona abathi kumele umndeni kamsolwa udingiswe endaweni. Uncome ukubambisana kwemindeni, eveza nokuthi umndeni kamsolwa uphinde wafika izolo ukuzobhonga emswaneni.
Ilungu lesigungu sabazali eNonhlevu Secondary, uMnuz Xolani Skade, lithe: “Siyafisa ukuthi kube nokuthula, le nto ingagcini seyiba yimpi yezikole kodwa ithathwe njengeshwa elehlela abafundi ababili, abalimazene. Sidlulisa amazwi enduduzo emindenini ngokubehlele. Nathi siyisikole sizolekelela lapho kudingeka khona,” kusho uSkade.
Okhulumela amaphoyisa KwaZuluNatal, uColonel Thembeka Mbele, uthe kuvulwe icala lokubulala esiteshini samaphoyisa KwaDukuza, kwaboshwa umsolwa ona-16 okulindeleke ukuthi avele enkantolo maduze.
Ungaphuthelwa yizindaba ezithinta umdlalo omkhulu wabakhaya baseSoweto
Sizokuphathela nabalandeli bephumela obala ngomdlalo wePirates neChiefs
Ezithinta umlenze womdlalo wokuqala we-Al Ahly neDowns eCairo
IDiski yomhlaba ikuphathele ezomdlalo omkhulu we-El Clasico