Injabulo kubuyisana izinhlangano zamatekisi
KUSHUNYAYELWE indaba yobumbano emhlanganweni wesifundazwe waminyaka yonke, yenhlangano yosomatekisi, iSouth African National Taxi Council (Santaco) eThekwini, izolo ngenhloso yokuqeda isihlava sokubulalana ematekisini.
Izolo kuphinde kwethulwa amadodana olahleko abehlubuke kwiSantaco, ahamba ayobumba enye inhlangano yosomatekisi, iNational Taxi Allaince (NTA).
La malungu ahamba kwiSantaco ngoba kukhona izinto angeneme ngazo.
Obehola iNTA, uMnuz Jabulani Mazibuko, uthe bathathe isinqumo sokuthi babuyele ekhaya ngoba befuna ukuqinisa ubumbano embonini.
“Sibonile ukuthi ukuba khona kwezinhlangano eziningi, akuyakhi imboni kodwa kuyihlukanisa phakathi, yingakho sinqume ukuthi siyivale iNTA sibuyele ekhaya elikhulu iSantaco, ukuze sisebenze ndawonye, sakhe ukuthula embonini yethu,” kusho uMazibuko.
Ethula inkulumo yakhe yokuvula umhlangano, uMengameli weSantaco, uMnuz Philip Taaibosch uthe kubalulekile ukubumbana embonini ukuze kuphele isihlava sokubulalana nokuchitheka kwegazi.
“Siyangijabulisa isinqumo esathathwa ngabafowethu abebekwiNTA, abanquma ukuthi babuyele ekhaya, ukuze sisebenze ndawonye sisebenzele ukuthula. Into engijabulisile kakhulu wukuthi abazange babuzwe ukuthi baphumaphi nokuthi babehambeleni kodwa bamukelwe ngezandla ezimhlophe,” kusho uTaaibosch.
Uthe bayafisa ukuthi imihlangano yaminyaka yonke iqhamuke nezisombululo ezingalekelela imboni ukuze ithuthuke.
UTaaibosch uthe ngeke bangabaze ukuyisa uhulumeni enkantolo, uma bebona ukuthi akafuni ukubalalela.
Uveze nokuthi bathathe nesinqumo sokudlulisela ophikweni oluphenya amacala akhethekile, iSpecial Investigations Unit, umbiko kaMvikeli woMphakathi othi ama-panel vans kumele aqedwe.
Uthe kukhona izinto abafuna zishintshwe emthethweni kahulumeni, wokuthatha amaphuzu kwabenza amaphutha emigwaqweni.
“Thina sithi abashayeli abazithwalele amaphutha abo okushayela budedengu, thina sithwale amacala okuthi izimoto azikho esimeni,” kusho uTaaibosch.