Izinyunyana zichitha ukuncishiswa kwemiholo
AZENEME neze izinyunyana ngesiphakamiso sikaNgqongqoshe wezeziMali uMnuz Tito Mboweni sokunciphisa amaholo abasebenzi bakahulumeni ngoR160 billion kule minyaka emithathu ezayo.
UNobhala Jikele weCosatu, uMnuz Bheki Ntshalintshali, uthe uhulumeni ulwa nabasebenzi ngalesi siphakamiso futhi bazolwa naye.
“Ngeke sithule uhulumeni ephuca abasebenzi iqatha emlonyeni. Kuyacaca ukuthi akazimisele ukunyusela abasebenzi amaholo. Lokhu kuzomqhatha nathi ngoba abasebenzi bakahulumeni basebenza kanzima, abaholi kahle njengoba esefuna ukubalwisa ngamaholo,” kusho uNtshalinthali.
Uthe bazomisa yonke into eNingizimu Afrika uma uhulumeni eqhubeka nokulwa nabasebenzi.
Uthe bazimisele ukuxoxa nohulumeni ngezinhlelo zokufaka imali esikhwameni sikahulumeni, abale kukho ukunciphisa imihlomulo yezikhulu zikahulumeni, wukuqinisekisa ukuthi izinkampani zikahulumeni ziphathwa ngendlela efanele, wukuqedwa kwemihlomulo yezikhulu zomasipala nokuqedwa kwezikhala ezingekho zabasebenzi noma abasebenzi “abayizipoki”.
UNobhala Jikelele weSaftu uMnuz Zwelinzima Vavi uthe kuyichilo ukuthi uhulumeni ufuna ukunciphisa imiholo yabasebenzi ekubeni kunezikhala eziwu-80 000 ezingagcwalisiwe eminyangweni ehlukene kakhulumeni.
Uthe imiholo yabasebenzi yindawo yokugcina uhulumeni angadlalela kuyona ngoba kuyimanje bathwele kanzima.
UMnuz Siphamandla Mkhwanazi oyisazi somnotho eFNB uthe uMboweni ubebhekene nesimo esinzima sokuzama ukungenisa imali emnothweni wezwe ekubeni ungakhuli ngendlela efanele nesikweletu silokhu sanda.
UMnuz Renzi Thirumalai oyinhloko yezokutshalwa kwemali eFNB uthe izinyunyana akufanele zilwe kakhulu noMboweni kodwa kufanele zixoxe naye ziwuzwe kahle umbono wakhe.
“UMboweni ngeke adilize abasebenzi bakahulumeni kodwa azokwenza wukuthi ngeke amaholo esawanyusa njengakuqala. Usezovele awanyuse ngokwamandla emali kuphela angafaki omunye uchatha,” kusho uThirumalai.