ICosatu isola uhulumeni ngolwezitimela
UMFELANDAWONYE wezinyunyana zabasebenzi iCosatu usole uhulumeni ngokushaya ngonyawo lonwabu ekulungiseni izinkinga zezitimela ezithwala izigidi zabantu uma beya emsebenzini nasezikoleni.
Ithe iyakwamukela ukutshalwa kukaR1.4 billion ozoqinisekisa ukuthi kusentshenziswa ingqalasizinda yesimanje ngoba abasebenzi bafika sekudlule isikhathi emsebenzini bagcine sebexoshwa.
UNobhala jikele weCosatu, uMnuz Bheki Ntshalintshali, uthe isigungu esiphezulu seCosatu sifuna uhulumeni atshale imali ethe xaxa kwezokuthutha ayeke ukwandisa ama-toll gates namaetolls awumthwalo emahlombe omphakathi.
Uthe bayawubona umsebenzi owenziwa wubuholi obusha ekulweni nenkohlakalo kodwa bakhathazekile ukuthi kuhamba kancane ukushushiswa kwalabo abathinteka enkohlakalweni.
“Asihambisani nokuthi kwelulwe isikhathi sokusebenza kwekhomishini yeJaji Raymond Zondo ngoba kufanele bashushiswe abathinteka enkohlakalweni,” kusho uNtshalintshali.
Uveze ukuthi bazobamba iqhaza ekulweni nodlame olubhekiswe kwabesifazane. Ucele uMengameli Cyril Ramaphosa ukuthi asebenzise isihlalo sakhe kwi-African Union ukuletha uxolo e-Afrika nokuhlonishwa kwamalungelo abasebenzi.