Umfundi ugwaze omunye ngesikele ekhanda
UFUNA aboshwe umfundi (10) umzali womfana ogwazwe ngesikele ekhanda sabhajwa ebuchoshweni.
USiyanda Hlongwane (11), ofunda e-Ashdown Primary, uyelashwa esibhedlela emuva kokulimala ngesonto eledlule.
Kuthiwa ingxabano yabangani abahlala ngandawonye iqale phambi kwabafundi.
Unina kaSiyanda, uNksz Mbalenhle Hlongwane (28), obekhuluma esesibhedlela, uthe yize esemncane umfundi ogwaze ingane yakhe kodwa kumele ajeziswe ukuze afunde.
“Engikufisayo ukuba le ngane eyenze le nto ithole usizo, iyalwe ngokomqondo ukuze yazi ingozi yento eyenzile. Uma kwenzeka kungakuhle iboshwe, ihlale ejele ukuze ingeke isakwenza lokhu kwezinye izingane,” kusho uNksz Hlongwane.
Uthe yize ebengekho indodana yakhe igwazwa kodwa uthole ukuthi kube nombango othinta u-R5 okuthiwa untshontshwe wumfana ogcine ngokugwaza indodana yakhe ngesikele ekhanda.
“Isikele sihlale ekhanda amahora awu-24 ngoba esibhedlela esilana eMgungundlovu bathe ngeke bakwazi ukusikhipha ngoba sisendaweni ebucayi, sithinte ubuchopho.”
Uthe ize yayiswa esibhedlela esiseThekwini yafike yakhishwa khona isikele.
Uthe ingane yakhe yize ilulama kodwa isabukeka ikhathele nesandla sakwesokudla asikasebenzi.
“Ngicabanga ukuthi kuningi okuphazamisekile, okwamanje sizolinda aze alulame.”
Uthe uma eseluleme uzobe esebuyela esikoleni, uma lo omunye umfundi engekho.
“Uma umfana omhlasele esekhona esikoleni, ngizophoqeleka ukuthi ngimtholele esinye isikole ngoba akasaphephile.”
Uthe icala ulivulile. Ubonge othisha ngokuhambisa indodana yakhe emtholampilo, yabe isidluliselwa esibhedlela.
Okhulumela uMnyango wezeMfundo KwaZulu-Natal, uMnuz Muzi Mahlambi, uthe bazwile ngokwenzekile basalusebenza udaba besebenzisana nabazali bezingane ezithintekayo.
Abakhulumela amaphoyisa eKZN bathe icala basalibheka.