Banikele ngoR1m e-UKZN besiza
ABABEFUNDA eNyuvesi yaKwaZuluNatal banikele ngoR1 millon ozosiza izitshudeni zakhona ezingakwazi ukubhalisa ngoba zikweleta.
Imali eqoqiwe bahlele ukuthi isize izitshudeni njengoba inyuvesi idinga u-15% wemali eziyikweletayo ngaphambi kokuthi zibhalise.
Umengameli wekomiti lababefunda kule nyuvesi, uMnuz Fanele Sibisi, uthe bathathe isinqumo sokuthi balule isandla ngemuva kokuthi kucelwe abangaphumelela ukwelula isandla, basize.
Iphini likaShansela wale nyuvesi uSolwazi Nana Poku lizwakalise ukukhathazeka ngezinselelo ezibhekene nenyuvesi selokhu kuqale unyaka.
Wabe esecela abangakwazi ukulekelela ukuthi basize izitshudeni ezikweletayo. Isikweletu sezitshudeni ngo-2010 senyuke saba nguR600 million, ngo-2019 bese senyukele kuR1.7 billion.
UPoku uthe inyuvesi ayikwazi ukucisha lesi sikweletu.
USibisi uthe isimo sezimali sakuleli esintengantengayo, ubuphofu nokushoda kwemisebenzi kunomthelela kulolu daba.
“Abazali abaningi babafundi babhekene nenkinga yalezi zinto engizibalile. Asikwazi ukusiziba ngoba lesi simo sidinga ukuthi sonke sibambisane ukuze le nkinga isombululeke.
Siyikomiti sinikele ngale mali, ukuze isize ezinye izitshudeni ezingakwazi ukubhalisa ngenxa yezikweletu ezindala zokufunda kule nyuvesi,” kusho uSibisi.
Uthe le mali bahlele ukuthi isize u-60% wezitshudeni ezenza iziqu zemfundo zokuqala no-40% wabenza iziqu ezilandelayo. Uthe izitshudeni ezizohlomula ngezizalwa emindenini entulayo, abazali bazo abahola ngaphansi kukaR350 000 ngonyaka.