Izikhalo zokushoda kwamathuba omsebenzi
KUGQAME izikhalo zokushoda kwamathuba omsebenzi ngesikhathi uNdunankulu wakwaZulu-Natal, uMnuz Sihle Zikalala, ehambele erenki yaseChesterville, eThekwini, izolo ukuzwa imibono yabantu ngaphambi kwenkulumo azoyethulela isifundazwe ngesonto elizayo.
“Sixoxa nomphakathi wesifundazwe ngezindlela ezehlukene okubalwa kuzo nokuvakashela emarenki ukukhuluma nabantu abaya emsebenzini ukuzwa ngemibono yabo. Into abayiphakamisile udaba lwemisebenzi njengento eyisidingongqangi,” kusho uZikalala.
Uthe abantu bakhale kakhulu ngokufudukela kwabantu bokufika kuleli bathathe umsebenzi nalapho beveza ukuthi iningi labokufika lithatha umsebenzi okumele ngabe wenziwa abantu baseNingizimu Afrika.
Uthe amaphuzu aphakanyiswa ngabantu ayiqiniso. Uthembise ukuthi uhulumeni uzozama ukuqhamuka nezindlela ezizoqinisekisa ukukhula komnotho ukuze kudaleke amathuba omsebenzi. Uqinisekise ukuthi uhulumeni uzozama ukungagcini ngokukhuluma kodwa wenze okuthembisayo.
UZikalala uthe olunye udaba oluzoba seqhulwini ngelokulwa nobugebengu.
Abantu bathole ithuba lokuxoxa nondunankulu babeke imibono yabo emuva kokuthi egibele enye itekisi ebisuka eChesterville iya eThekwini.
Ngaphambi kokugibela itekisi unike abantu amapheshana okuqinisekisa ukuthi bayayithamele inkulumo yesifundazwe ngesonto elizayo ezobe isakazwa bukhoma kwezinye iziteshi zethelevishini nezemisakazo.