Kuyasetshenzwa noma kungakalungi kahle
KUYAQHUBEKA ukusebenza emahhovisi oMnyango wezaseKhaya KwaZalulu-Natal nakuba ingakapheli nya inkinga yokujama kwemishini okuthiwa kuqale ngesonto eledlule.
Isolezwe libike ngemishini ejamayo emahhovisi oMnyango wezaseKhaya asemgwaqeni uMngeni, eThekwini ngoLwesibili.
Kuyaqhubeka ukubonakala kwabantu beshaye ujenge kolayini abade kulama hhovisi. Abanye bayadikila baphume ngesango benengwa ukulinda isikhathi eside kulayini.
Bakhala ngokumosha imali abasuke begibele ngayo, isikhathi futhi nokujuqwa yindlala ngesikhathi belinde usuku lonke bengasizwa.
Imenenja yomnyango KwaZuluNatal, uMnuz Cyril Mncwabe, ithe bayaqhubeka nokusebenza nakuba ingakalungiswa kahle hle inkinga.
“IPitoli ibingakasitsheli ukuthi yini eholele ekutheni imishini ijame nokuthi kuzolungiswa nini. Kodwa ukusebenza kuyaqhubeka. Imishini iyasebenza iphinde inqamuke,” kusho uMncwabe.
Phambilini uMncwabe uthe inkinga kazwelonke yokujama kwemishini eMnyangweni wezaseKhaya, wathi iyayilungiswa.