Kutholwe isidumbu ehlathini
KUTHOLAKALE isidumbu sendoda ehlathini eliseduze komgwaqo uM25 budebuduze nenxanxathela yezitolo eBridge City, KwaMashu, izolo ekuseni.
Isidumbu esingaziwa ukuthi esikabani, kuthiwa sibonwe wumuntu obenqamula ngendlela encane esuka emgwaqweni inqamule ihlathi ikhuphukele ebhrijini, iNewtown Bridge.
Okhulumela inkampani yonogada iReaction Unit South Africa (Rusa) uMnuz Prem Balram, uthe ngo-8.52 ekuseni uphiko lwabo lwasePhoenix luthole ucingo obeluvela kumuntu obedlula ngendlela.
“Lo muntu uthi ubone isidumbu ngesikhathi edlula ngendlela. Sifike sangena esikhotheni esikule ndawo sathola isidumbu sidindilize eceleni kwale ndledlana. Besinamanxeba amaningi kwesingezansi, esifubeni nasemhlane,” kusho uBalram.
Uthe onogada bathole lesi sidumbu emuva kokubona igazi likamufi ebeligcwele phansi kusukela emgwaqweni lize liyokubeka phezu kwebhriji. Uthe imiphumela yokuhlolwa kwesidumbu ezocacisa ukuthi umufi ugwaziwe noma udutshuliwe.
Okhulumela amaphoyisa KwaZulu-Natal, uColonel Thembeka Mbele, ukuqinisekisile ukuthi kutholwe isidumbu somuntu sinamanxeba okugwazwa. Uthe amaphoyisa asePhoenix aphenya icala lokubulala.
Khonamanjalo amaphoyisa asesiteshini saKwaMashu acela ukufuniswa izihlobo zowesilisa isidumbu sakhe esatholwa ehlathini eliseduze komgwaqo uMalandela kwa-C ngoNovemba 9 nyakenye.
Isidumbu sowesilisa iminyaka yakhe elinganiselwa phakathi kuka-30 no-40, satholwa sigqoke
IKHASI ELIKHOKHELWE amateki, i-jean e-blue, nesikibha esasinombhalo othi: “Khwishizwa Red Activity”. Une-tattoo engalweni yakhe kwesobunxele. Kuvulwe idokodo ngokufa komuntu.
Kucelwa noma wubani ongaba nolwazi ngaye noma isihlobo sakhe axhumane noDetective Warrant Officer FM Luthuli enombolweni ethi: 082 337 5453 noma iCrime Stop ku-08600 10111.