Kuboshwe abatholakale nezimpahla zokwebiwa
KUBOSHWE amadoda amane abehamba ngemoto ebinezimpahla okusolwa ukuthi zebiwe edolobheni eThekwini ngoLwesithathu ntambama.
Kulindeleke ukuthi avele eNkantolo yeMantshi yaseThekwini namhlanje ngecala lokutholakala nezimpahla ezebiwe.
Okhulumela amaphoyisa KwaZulu-Natal uColonel Thembeka Mbele uthe amaphoyisa alunywe indlebe ngemoto ebibandakanyeka ezigamekweni zokuphanga.
“Imoto ebizulazula nezimpahla zokwebiwa ibonwe ngamaphoyisa emgwaqweni uSt Georges, abe eseyisesha.
Kutholwe amaselula ayisithupha nekhompyutha. Zibe sezibakhalela abasolwa abane abaneminyaka ephakathi kuka-22 no-25 ngokutholakala nezimpahla okusolakala ukuthi zebiwe,” kusho uColonel Mbele.
Uthe abasolwa bazobhekisiswa ukuthi awekho yini amanye amacala okuphanga abayamaniswa nawo enkabeni yedolobha iTheku nasezindaweni ezilakhele.
UKhomishana wamaphoyisa KwaZulu-Natal uLieutenant General Khombinkosi Jula ucele umphakathi ukuba upheze ukuthenga izimpahla ezintshontshiwe.