UMboweni ubuyise ithemba ekulweni nenkohlakalo
KUPHINDE kwafakazeleka ukuthi kalikho isoka elingenasici njengoba kukhona ukukhala nenjabulo ngesabelomali sikaNgqongqoshe wezeziMali, uMnuz Tito Mboweni, asethule ePhalamende ngoLwesithathu.
Yize ziningi izikhalo kodwa kubuye ithemba ngempi yokulwa nenkohlakalo ngenxa kaR2.4 billion owabelwe iNational Prosecuting Authority (NPA), Special Investigating Unit (SIU) noKlebe.
Abantu baseNingizimu Afrika bebehlale bezibuza ukuthi abasolwa ngenkohlakalo evela kwiKhomishini yeJaji Raymond Zondo ephenya ngokulawulwa koMbuso yidlanzana, bazoshushiswa nini? Ngakho lo mbuzo sewucishe uphenduleke ngoba inselelo seyisele nabaholi balezi zikhungo.
UMboweni uthe le mali ayabele iNPA izosiza lolu phiko ukuthi luqashe abaphenyi abawu-800 nabashushisisi abawu-277.
Kuyajabulisa ukuzwa lokhu ngoba ababaningi abaphenyi ababhekelele amacala athinta inkohlakalo.
Ukuqashwa kwabaphenyi abaningi kusho ukuthi baningi abazobhekana nomthetho bangagcini ngokuboshwa kodwa bashushiswe nasezinkantolo uma sekwandiswe isibalo sabashushisi.
Nokho kushiya umbuzo ukuthi kungani vele iNPA ibiyekelelwa, inganikwa imali eyanele yokuthi kuliwe nenkohlakalo.
Siyathemba ukuthi iNPA izolubheka nodaba lwenkontileka yeSABC neMultiChoice kaR500 million nezinye eziningi eziyimbangela yokuthi le nhlangano ihluleke wukwenza inzuzo njengebhizinisi.
Siyathemba ukuthi le mali efakiwe izogqugquzela iNPA ukuthi ivumbulule amacala akudala afana nelesivumelwano sikaR3.7 billion esasayinwa yi-Eskom neTegeta eyayizodayisela le nkampani amalahle.
UMboweni uphinde watshala uR1.8 billion eMnyangweni wezoBulungiswa nokuHlunyeleliswa kweziMilo. Le mali izobhekana namacala athinta udlame olubhekiswe kwabesifazane abakhala ngokuthi amacala abo aphelela emoyeni.
UMboweni ufake uR15 million ozosetshenziswa emikhankasweni ehlukene yokulwa nokuhlukunyezwa kwabesifazane kuleli.
Uma kunganqotshwa inkohlakalo, kubuyiswe nemali eyebiwe – kungaba kuncane ukukhala ngesabelomali.