Liyabhubha abantu bahluleka ukulawula ukuhala kwabo
NGIKHOLWA wukuthi akekho umzali ongathi akazi ukuthi uzele ingane ehalayo, ingane ehalayo ibonakala isencane ukuthi ingumlobizi ozolobizela izinto zabantu.
Kuyiqiniso elingephikwe ukuthi zonke izingane zikhula ngokuhala kodwa kunezingane ezihala zisencane kucace ukuthi kuyosiza ukuzibopha ngamaketanga aboshwe ngezingidi ukuzinqanda zingagabavuli ngokuhala.
Kuke kuthi ingane ivakashele emzini womuntu ifike ihale kuze kujabhe abazali bayo isikhalela amajusi asefrijini.
Uthole ukuthi umzali wayo ulokhu ethi: “Umthetho wakhe uyakhala azigingqe phansi uma esefuna ukuphiwa into ayithandayo.” Lo mzali ukhuluma kanje ongathi akaqondi ukuthi la majusi akhalelwa yingane yakhe abekelwe izingane ukuze ziwaphathe esikoleni.
MaSolezwe mina sengakhathala wukuhlushwa yizingane ezihalayo emabhasini, uthi ugibele ibhasi uhlushwe yingane ikhalela umphako wakho uze ufikelwe ngamahloni.
Ngelinye ilanga ngathi ngisebhasini ngabona ingane ichiphiza izinyembezi, uma ngibuza ukuthi ikhalelani yathi: “Mina funa nyama.” Lokho kwabe sekusho ukuthi kufanele ngiyihlephulele emlenzeni wenkukhu engabe ngiwudla.
Ngokubona ukuthi amabhasi afuye amanketshane anezingane ezihalayo nganquma ukuthi sengizozihambela ngamatekisi.
Nakhona ngihlangabezane nenkinga ngoba ngithe ngisazithokozisa ngo-ice cream ngezwa sekukhala ingane ithi: “Cela ukhothise bandla malume.” Ngenxa yamahloni ngavuma ngelula isandla ngathi ayikhothe kodwa yona yavele yawuluma yawushewula isikhala esikhulu. Ngezwa ukuthi ngiyacasuka kodwa ngazibamba. Ngithe ngisaqhubeka nokukhotha u-ice cream wami ngezwa le ngane isiphinda ibibitheka kwacaca ukuthi seyifuna ukuphinda ilume indawo enkulu. Ngathi ngenhliziyo le ngane izophuza ukungazi ngavele ngawufaka wonke emlonyeni u-ice cream, ngayizwa ikhala ithi: “Uyambona ewuqeda mama.”
Umbuzo engizibuza wona ngothi le ngane ehamba ikhalela o-ice cream babantu kungani umzali wayo engayithengeli oncamunce ngoba uyayazi ukuthi iyahala. MaSolezwe okaVolos akasho ukuthi uthini kodwa lona ilizwe liyabhubha ngenxa yabantu abehlulwa wukulawula ukuhala kwabo. Kwenye indawo engingafuni ukuyidalula ngethuke ngoma ngibona ingane yesikole ihalela isinemfu sami yaze yaqunga isibindi yasicela.
Ngiqale nganganaka ngibona le ngane ihleka uma ngifaka isinemfu emakhaleni kodwa ngibenakho ukuxwaya uma seyimamatheka ingaqedi. Ngithe ngiqeda ukuthimula ngayibona seyimi phambi kwami yathi: “Ungadinwa bandla uze ucabange ukuthi angihloniphi, umthetho wami ngiyazifela ngesinemfu.”
Ngivele ngezwa ngidinwa uma ngibona ingane yesikole ifuna ukungenza inhlekisa kuze kuthiwe yimina engayifundisa isinemfu. Ngenqabe nesinemfu sami ngisho isingincenga iqamba amanga ithi yisona esiyihlakaza umqondo ukuze ikwazi ukuphasa izifundo ngamalengiso.
Buyani nina bantwana abahlehlayo, ngikuphulukise ukuhlehla kwenu.